Runway kan Bicol Int’l Airport, depektibo-OPABA

Dai pa ngani nasikad an operasyon kan Bicol International Airport sa Daraga, Albay nadiscobre kan Technical Working Group (TWG) kan Office of the Presidential Adviser for Bicol Affairs (OPABA) na depektibo an runway na delicado sa aksidente sa eroplanong ma-landing.


Afuera sa depektibong patrabajo, an problema pa sa slippage na sisimbagon kan duwang kontraktor na iyo an Cuerpo Construction Corporation asin San West Construction Corporation mantang an target completion pigtalaan sa Noviembre 2020.

Duwang mga engineers kan TWG asin sampolong estudiantes kan engineering department kan Naga College Foundation para sa saindang aktual na training naheling an dakul na krak kan runway asin nakuanan pa nin mga retrato bilang evidencia na igwang depekto an bilyones pesos na proyecto kan gobierno nasyonal.

Ini an pigbuyagyag ni Presidential Adviser for Bicol Affairs, dating Juez Marvel Clavecilla kan makuanan nin entrevista kan Bicol Mail mantang mandato sa saindang opisina ni Presidente Rodrigo Duterte na mag-monitor kan mga national infrastructure project sa rehiyon cinco.

Nakumfirmar kan TWG an nagdadakul na an krak kan runway asin ngonian na Oktubre 25 liwat ma-inspeksyon asin maconducir nin boring test nganing madeterminaran kun gurano kararum an naggagaratak na runway.

Kun igwang problema an proyecto marecomendar an OPABA na patanidan an mga kontraktor asin kalkalon an runway nganing toltolon an patrabajo na papasanon ninda an gastos.

Nin huli ta recommendatory sana an OPABA ipapaabot an reklamo sa Office of the President asin sa Department of Transportation (DOTr).

‘’Delicado an impact kun magagagamit an runway an peligro sa eroplano kan 747 sa gabat sa pag-landing sana kun may gabat ini nin diez mil kilos pag nag-landing an impact delicado kun ma-multiply nin sampolo aaboton sa 100 mil kilos’’

Nahahadit pa si Usec Clavecilla kun depektibo an paka-konkreto kan runway puedeng lumobog asin posibelng makarasay sa gilid, na sana dai mangyari.

An Cuerpo Construction Corp. iyo an nagpatindog kan tolong darakulang edificio sa Bicol Medical Center na igwa man nin problema.

Ipapaapod ko an kontratistang ini ta sinda an naggibo kan Terminal Bldg. sa BIA na ngonian grabe na an slippage pati na si tower abalahon nang marhay, mala ngani igwa nang instruksyon si DOTr Secretary Arthur Tugade nganing matapos sa pigtaong time line ni Presidente Duterte asin kun padagos na ma-aabala mapipierde an gobierno.

Pig-osipon pa ni Clavecilla si duwang truck na pig-report kan duwang kontratista na pigsulo kan NPA alagad sa imbestigasyon kan National Intelligence and Coordinating Agency asin kan PNP bako man trabajo kan rebeldeng grupo asin taga laog man sana an responsable nganing igwa sindang dahilan na nagiging causa kan abalang proyecto iyo an mga rebelde.

Sa imbestigasyon duwa sanang tawo an naheling asin dai tubod digdi an mga awtoridad na kun gibo kan NPA dapat igwa pang nakapalibot nganing protehiran an saindang pag-iriba. (DPA)