2 boundary marker kan LGUs pinapagaba


Boundary marker na ginastosan nin maabot sa on milyon pesos kan LGU Canaman sa linderos kan Bagumbayan Norte, Ciudad nin Naga asin Canaman, Camarines Sur tugot nang ipagaba sa DPWH kun apektado kan road widening project asin road clearing kan DILG. (dpa)



Duwa nang boundary marker na ginastosan nin dakulang fondo itinugot na kan lokal na gobierno na gabaon nin huli ta apektado kan road clearing sa direktiba kan Department of Interior and Local Government (DILG) asin road widening project kan Department of Public Works and Highways (DPWH).

An LGUs kan Bombon asin Canaman sa tercer distrito kan Camarines Sur na parejong yaon sa laog kan road right of way asin apektado kan road widening project kan DPWH nagtugot na gabaon an saindang boundary marker.

Namumugtak sa may linderos kan Bombon asin Magarao asin an ika-duwa sa Canaman asin Bagumbayan Norte kan Ciudad nin Naga.

Si Alcalde Embot Angeles kan Bombon, Camarines Sur nagsabi na mayo nang cuestion sa sainda kun gagabaon kan DPWH na kaipuhan gamitan nin heavy equipment asin sa Canaman sa kahagadan kan LGU sa paagi nin resolucion kan Sanggunian Bayan alagad dai paman pigpunan na gabaon kan personajes kan obras publika nin huli ta an gastos kaipuhan pasanon kan LGU asin matabang sana an ahencia.

Si Assistant District Engr. Richard Emmanual Ragragio kan 3rd Engineering District kan DPWH nagsabi na sinda nagtatabang sana sa kahagadan kan LGU mantang igwa sindang heavy equipment nganing makatabang sa paggaba nin huli ta dai kakayahon kun mano-mano an pagtrabajo.

An mga ulang na estraktura sa tinampo kabali na an mga boundary marker dawa propriedad kan gobierno tatamaan kan road clearing operation na pig-iimplementar kan lokal na gobierno alagad piglinaw kan DPWH nagtatabang sana sinda sa kahagadan kan LGU.

Nagkapera pang kaparejong ulang na estraktura sa road right of way siring kan nasa linderos kan barangay Mabulo, Ciudad nin Naga asin Milaor, Camarines Sur, brgy. Del Rosario, Ciudad nin Naga asin Palestina, Pili, Camarines Sur alagad duwa pa sanang LGUs an naghagad nin tabang sa DPWH.

An Barangay Hall in the Sky sa barangay San Marcos, Camaligan, Camarines Sur hinahagad na an tabang kan LGU sa DPWH alagad nagsibog kan pagpagaba envez nagpasar nin resolucion asin suportado kan Sangguniang Panlalawigan kan Camarines Sur na hinahagad sa DILG na tawan sinda nin considerasyon sa dahilan na mayong babalyohan asin bako man national road an saindang lugar. An DILG central office mayo pang kasimbagan sa resolucion. (dpa)