3 gadan, 5 iredo sa iriwal sa daga

‘’Dawa ako magadan ipaglalaban kan sakuyang familia an deretso sa propriedad na declarado na bilang sakop kan programa sa land reform kan gobierno’’

Ini an mga pahayag ni Leopoldo Jeremias, 76 años kan barangay Balatas, Ciudad nin Naga matapos kan madugong insidenteng baradilan na tolo an binawian nin buhay asin limang iredo, perang metros sana sa atubangan kan saiyang residentes asin sa atubangan kan Sto. Niño Memorial Park huli kan ‘’land dispute’’.

An mga biktima iyo sinda Ronald Ocares, trabajador kan Sto Niño Memorial Park, Moises Onaya taga brgy. Balatas, jefe kan mga security guard sa pribadong kamposanto asin an suspechadong nagbadil sa sainda na si Army Corporal Leo Jeremias, aki ni Leopoldo miembro kan 9th Infantry Division kan Philippine Army sa Bicol.

Kinumfirmar ni City Director P/Col Felix Servita Jr. kan Naga City Police Office na iriwal sa daga an naging causa kan madugong insidente na nangyari sa atubangan kan Sto. Nino Memorial Park pasado alas 9:00 kan Martes, Oktubre 29.

An mga iredo na tolos pigdalagan sa hospital iyo sinda, Richard Deretso, Joseph Rey, Iric delos Santos, Silvestre Perena asin Franciso Baesa, anas security guard kan Black Sniper Security Agency na destino sa pribadong kamposanto.

Sinabi kan NCPO an iridero kan familia Mariano na si Girlie Mariano sinugo an saiyang mga personajes sa pribadong kamposanto na kudalan an propriedad na pig-oocupar ni Leopoldo Jeremias huli ta sainda pa ini. Alagad an familia Jeremias nagtutubod na sinda na an may deretso asin saindang piglalaban an caso.

Alagad kan maghapit si Cpl. Jeremias, aki ni Leopoldo nganing mag-urolay kan mga preparasyon sa kumpleanyo niya sa Noviembre, inabotan an mga nagkaperang taohan kan Sto. Niño na nagkukudal sa atubangan kan cuarenta metros cuadradong lote kan saiyang ama. Digdi na nagkabirigla sagcod na nagpurotokan.

Sinabi man ni Elmer Jermias, tugang ni Col. Jeremias naghagad kuta na siyang police assistance sa Police Station sa Rotunda sa brgy. Concepcion Grande, alagad an nakadestinong pulis nagsayuma huli ta mayo man nangyayaring komosyon.

Kun naka-responde an mga awtoridad antes kan insidente mayo kuta nang nangyaring baradilan, sabi pa.