8K residentes pig-enrol kan LGUs sa Philhealth

Igwa nang otso mil (8,000) na mga residentes sa Camarines Sur na dai kabali sa listahan kan Department of Social Welfare and Development (DSWD) bilang benipisyaro kan 4Ps an tinabangan kan mga lokal na gobierno na maging miembro kan Philhealth insurance sa lindong kan saindang programa sa salud.

Pigserne kan LGUs an listahan na dapat matawan nin prioridad si dai kabali sa programa kan 4Ps nganing matawan nin health insurance an considerado nang pobreng familia asin tikapo na sa pagbuhay para regular makahulog bulan-bulan sa Philhealth.

Si Camarines Sur Provincial Director Annel San Pablo sa sanga kan Philhealth sa Ciudad nin Naga nagsabi na igwa nang total na viente cincong (25) LGUs an nagtatabang sa pobreng familia sa paagi kan LGU-Sponsorship-Members asin ini kinababalihan kan Baao, Balatan, Bato, Bula, Calabanga, Camaligan, Canaman, Del Gallego, Ciudad nin Iriga, Lupi, Minalabac, Ciudad nin Naga, Nabua, Pamplona, Ocampo, Pasacao, Presentacion, Ragay, Sagnay, San Fernando, San Jose, LGU Sipocot, South Centro Sipocot, Tigaon asin Tinambac.

Nagkaperang mga LGUs kun bago na an administrasyon pakatapos kan eleksyon dai na pinapadagos an LGU-SP-Members sa Philhealth.

Alagad si dai kaayon sa LGU-SP-Members, sainda man giraray tinatabangan si mga pobreng familia na igwa sindang tolong mga hospital na nag-iimplementar kan inaapod na ‘’point of service’’ na kinababalihan kan City Hospital, Bicol Medical Center asin Bicol Sanitarium sa Cabusao, Camarines Sur.

An mga LGUs na mayo kan sponsorship program iyo an Goa, Libmanan, Magarao, Milaor, Gainza, Cabusao, Siruma, Garchitorena, Pili, Caramonan asin Buhi. (DPA)