Curriculum sa drug prevention i-aadaptar kan DepEd Sorsogon

Itutulod kan Department of Education (DepEd) sa Ciudad nin Sorsogon na i-adaptar man digdi an anti-illegal drug abuse curriculum sa segundarya na unikong pig-iimplementar sa lokal na gobierno kan Ciudad nin Naga na dakulang bagay sa drug prevention.

Ini an mga pahayag sa Bicol Mail ni Dr. William Gando, dating DepEd Supt. sa Ciudad nin Naga asin dai palang nahahaloy pigdestino na sa Ciudad nin Sorsogon.

Kun pig-iimplementar na sa Naga taño ta dai man puedeng gibohon sa Sorsogon alagad saiyang i-aatubang sa lokal na gobierno nganing saindang pag-olayan, sabi pa ni Gando.

Si Consejal Joselito del Rosario iyo an padreno kan ordinansa sa curriculum sa drug prevention sa Sangguniang Panlungsod sa Ciudad nin Naga na inaprobaran kan Agosto 14, 2018 asin ngonian na school year iniimplementar na sa mga pampuliko asin pribadong escuelahan kan ciudad.

An ordinansa may titulong ‘’Development and integration of a localized, values-based and holistic anti-illegal drug abuse curriculum for high school level in Naga City’’.

Antes na-aprobaran an ordinansa nag-agi sa halawig na proceso sagcod sa mga ginibong consultasyon sa mga pribado asin pampublikong escuelahan asin iba pang sektores sagcod finalmenteng na-aprobaran kan 2018 asin si Dr. Gando saro sa nagsuporta sa drug prevention curriculum.

Inomaw ni Gando an ordinansa kan City Hall huli ta unikong sa Ciudad nin Naga an igwa kaini sa enterong nasyon asin pinapaboran niya na i-adaptar man sa Sorsogon City.

An DepEd nagsusuporta sa campanya kan gobierno contra sa ilegal na droga nganing mailikay an jovenes sa ilegal na actividad.

Si Gando, nagserbe nin apat na taon sa DepEd Naga huli kan marhay na acomplisimiento sa saiyang liderato asin pagiriba sa ahencia tinawan nin onra kan City Hall na saiyang pigrecibe pakatapos kan flag rising ceremony kan Oktubre 27.