ISYU SA PRIBADONG KORPORASYON: Mga partylist kan electric coop vs Bicol Light, sabi


Naka-inset sa itaas si APEC partylist Congressman Sergio Dagooc nagpaplatika sa atubangan kan mga opisyales kan cooperativa nin electricidad sa Bicol na sinda contra sa pagtao nin franquicia sa Bicol Light and Power Corporation. (dpa)


Apat na partylist kan 121 mga cooperativa nin electricidad sa Luzon, Visayas asin Mindanao nanindugan na saindang pigcocontra an propuestong bill sa congreso sa pagtao nin franquicia sa pribadong korporasyon na magpadalagan bilang distribution utility sa Rinconada area mantang nagdadanay pa an sampulong taon na franquicia kan Casureco III.

Alagad makaduda an panindugan na iyan kan enot nang makapasar an bill sa Congreso sa 3rd and final reading an resulta kan borotohan 221 contra zero.


Si Congresista Sergio Dagooc kan APEC partylist na saro sa mga nagtaong mensaje sa Bicol Electric Cooperative (BECA) Forum na bisita si NEA Administrator Edgardo Masongsong na ginibo sa Robinson Hotel sa Ciudad nin Naga nagpahayag sa atubangan kan mga opisyales kan mga cooperativa nin electricidad sa Bicol na an saindang panindugan contra sa House Bill 4437 na tawan nin franquicia an Bicol Light and Power Corporation (BLPC) para magconstruhir asin magmantenir kan electric power corporation system sa ika-limang distrito kan Camarines Sur na kinababalihan nin mga banwaan kan Balatan, Buhi, Baao, Bato, Bula, Nabua asin Ciudad nin Iriga.


An dahilan na oras maglaog an sarong pribadong korporasyon ciertong malangkaw an singil sa tarifa sa kuryente nganing mabawi an saindang pigkapital sa negosyo.


Kabali sa apat na mga partylist kan mga cooperativa nin electricidad iyo an APEC na pigrerepresentaran ni Cong. Sergio Dagooc, Philreca partylist na pigrerepresentaran ni Cong. Presly de Jesus, Recoboda partylist na pigrerepresentaran Cong. Godofredo Guja asin Ako Padayon Partylist na pigrerepresentaran ni Adriano Ebcas.


Alagad ngalas man an ibang opisyales kan cooperativa nin electricidad sa Bicol sa mga pahayag ni Dagooc na sinda anas nagcocontra sa BLPC apesar na yaon na sinda kan taon 2014 an HB Bill pa kaidto 5664 para sa franquicia kan pribadong korporasyon sa borotohan sa 3rd and final reading kan bill 221- zero an resulta na mayong nagcontra.


Saro pa sa saindang kaibanan na partylist congressman nagsabi na magiging profit oriented sana an Bicol Light huli ta tinutogotan na makaganansya nin 8 hasta 12 por ciento.


Maging man si NEA Administrator Masongsong nagpahayag man nin pagcontra sa bill alagad ngonian sana nagpapahayag kan saindang mga panindugan kun dai pa naglansar nin regional caravan an BECA asin Association of General Managers na dapat ibasura an pagtaong franquicia sa Bicol Light.


Si 2nd District Congressman LRay Villafuerte kan segundo distrito kan Camarines Sur iyo an nag-re filed kan HB Bill ngonian na 4437 na mayong nagcontrang lehislador maging partylist.


An bill isinakat na sa senado sa committee on Public Services na pinamamayohan ni Senador Grace Poe.


An iba pang detalye kan ginibong maghapon na BECA Forum dai naman nakua kan Bicol Mail matapos maaraman kan opisyal kan BECA na igwang media sa laog kan actividad na nagcocover asin kinua si Police Officer Magistrado nganing paluwason an reporter na ini apesar kan imbitasyon ni Casureco II Director Jun Cornelio.


An forum pig-organisar ni Canoreco Board President asin BECA Pres. Edwin Lamadrid na iyo an nagtaong instruksyon sa police officer. (DPAureus)