Bicol nagkakalap nin manga donasyon para sa Mindanao

Nagtitipon na nin mga donasyon an mga Bicolano, lokal na gobierno asin iba pang ahencia de gobierno tanganing magpadara nin tabang sa ribo-ribong mga apektado kan mga paglinog sa nagkaperang provincia sa Mindanao.

Sa tercer distrito kan Camarines Sur, an District Office ni Congresista Gabriel H. Bordado naglansar kan Oplan Tabang Mindanao na nakabase sa JMR Museum, Civic Center Compound.

Si dating Alcalde Abang Mabolo, chief of staff ni Congresista Bordado iyo an napili kan grupo nganing iyo an mamahala sa pagkalap nin donasyon hali manlaen-laen na sektores maging indibidduwal.

Sinabi ni Mabolo an proyecto saro sa pigtulod ni Bordado nganing magtarabangan an mga taga tercer distrito asin sa iba pang distrito mantang nagkakasararo an Bicolano sa pagtabang sa inagihan nin calamidad sa rehiyon kan Mindanao.

Nagaarabotan na an mga tabang sa JMR Museum na magdara nin sardinas, bagas, noddle, bottled water, trapal asin dakul pang mga tabang.

Sa Ciudad nin Naga, sinabi ni Bise Alcalde Cecilia ‘’Nene’’ De Asis na nag-urolay na sinda sa Sangguniang Panlungsod asin ni Alcalde Nelson Legacion na magpaluwas nin on milyon pesos na fondo nganing tabangan si apektadong residentes.

Dai palang nahahaloy an opisina rehiyonal kan Department of Social Welfare and Development, Office of the Presidential Adviser for Bicol Affairs asin an Department of Public Works and Highways nagtarabangan na magpadara sinda nin mga none food items sa Mindanao.

Nagkapera nang mga lokal na gobierno asin PNP sa Camarines Sur asin sa iba pang provincia sa Bicol an nagkakalap na nin mga donasyon para sa kaparejong proyecto. (dpa)