Alcalde dai awtorisado magpirma sa tsikie -SB

Pamplona, Camarines Sur – Nakabuelta sa posisyon si Alcalde Ace Cruz sa banwaan na ini huli kan writ of execution kan corte alagad dai siya tinawan nin awtorisasyon kan Sangguniang Bayan na magpirma sa mga transaksyon sa tsikie asin sa bangko.

An nagbabalik na alcalde nagsurat sa Sanggunian Bayan na tawan na siya nin awtorisasyon sa pagpirma sa mga transaksyon sa bangko alagad dai nagtugot an mayoriang miembros kan consejo envez pigpasa sa komite.

Sa borotohan apat na miembros kan SP an nagboto na dapat adalan muna kan saindang komite asin an tolo nagboto na igilid muna an resolucion.

Hahalaton muna kan consejo an magiging pinal na desisyon sa opisina central kan Department of Interior and Local Government (DILG).

Afuera pa kaini, igwa pang pendienteng petisyon sa Corte de Apelasyon na pigsangat kan discalifcado naman na magtukaw na alcalde Gemino Imperial.

Si Bise Alcalde Ronald Franco, presiding officer kan SP nagsabi iyan an desisyon kan mayoriang miembros iyo an dapat masunod.

Sa pinaluwas na desisyon kan Regional Trial Court sa Ciudad nin Naga pigpawaran nin saysay an proklamasyon ki Alcalde Imperial sa ginibong eleksyon kan Mayo 13, 2019.

Sa kaparejong desisyon an pigdeclarang magtukaw na alcalde iyo si Augustus Caesar ‘’Ace’’ Cruz, III bilang iyo an nag-ika duwang puesto sa resulta kan eleksyon bilang elihidong alcalde kan banwaan.

Sa resulta kan municipal canvass, si Imperial nakakua nin halangkaw na numero nin boto na 8,536 contra ki Cruz na 8,130.

Si Imperial pinawaran nin saysay an saiyang proklamasyon huli sa enot na desisyon kan Ombudsman na perpetual disqualification na magkapot nin ano man na posisyon sa gobierno alagad nagpadagos sa pagcandidato.