Dating jefe kan NCPC igwa pang pendienteng caso sa Naga, Manila
Afuera kan viente nieve (29) caso sa pagbalga kan Batas Pambansa 22, na mas midbid sa Bounding Check Law na pendiente sa Metropolitan Trial Court National Capital Region Branch 40, Ciudad nin Quezon envez igwa pang ibang caso sa Ciudad nin Naga asin sa Manila.
Ini an mga pahayag ni Ramiro ‘’Ram’’ I. Samar kan makuanan nin entrevista kan Bicol Mail na saiyang piglinaw na sarong caso sa Ciudad nin Naga asin saro man sa Manila.
Alagad an ibang investors matapos maaraman na nadakop na kan Milaor Municipal Police Station kan Noviembre 1 asin nakaluwas na sa carcel matapos makabayad na nin piyansang maabot sa P450 mil alagad an ibang investors niya sa Ciudad nin Naga asin Camarines Sur nag-aandam na magsangat nin caso kun padagos na dai ibubuelta an saindang kapital.
An orden na paluwason siya sa carcel hali sa sala ni Juez Soliman Santos Jr. kan RTC Branch 62 sa Ciudad nin Naga.
An Clerk of Court sa ciudad sinugo na ipadara an approved cash bond asin iba pang dokumentos sa MTC, sa Ciudad nin Quezon.
Si Samar, dating pamayo kan Naga City People’s Council (NCPC) nagpahayag sa media na saiyang inaangat an arin man na investors na nagsasabing pigluko sinda na magsangat nin reclamo kontra sa saiya.
Saiyang binabasol an mga paratukdo na nag-utang sa saiya alagad nagpalyar na magbayad kan saindang obligasyon. Kadakli sa sainda nag-utang nin 80 mil hasta 100 mil pesos.
Alagad an ibang paratukdo nagsabi man na dai man dapat sindang basulon mientras na dai ngani ninda aram kun sain nagtago si Samar huli ta dai ngani nagpapaheling sa sainda.
Huli kaini, naghahagad na siya nin tabang sa Civil Service Commission (CSC) nganing abisohan an mga paratukdo na puedeng sangatan nin caso administrativo sagcod na mapendiente an saindang pagretiro sa serbisyo kun dai ibubuelta an saindang inutang sa lending company.
Dinagdag pa kaini, na igwa pa siyang collectibles nin maabot sa 200 milyones peso sa mga nag-urutang kabali na si mga paratukdo sa escuelas publika. (dpa)