Mabuhay si Duterte saka si Robredo



Tibaad ako an pinakamaogmang Pilipino ta nagkahelingan na mata sa mata si Presidente Rodrigo Duterte saka Vice-Presidente Leni Robredo.

Pignombrahan kan Presidente an saiyang Vice-Presidente na magin Anti-Drug Czarina, katabang niya sa gyira kontra droga.

An problema sa ilegal na droga arog kan shabu, cocaine asin marijuana pan-kinabanon talaga. An dakulaon na problemang ini kan Pilipinas mas grabe pa sa ibang nasyones kan kinaban arog kan Estados Unidos de Amerika, Mexico, Colombia, maski duman sa Europa asin ibang nasyones digdi sa Asya lalo na sa Tsina.

Multi-bilyones dolyares na industriya, dakol an nagyayaman huli sa ilegal na aktibidades, dakol man an nagkakagaradan.

Digdi sato sa Pilipinas na-araman ta lang na dakulaon palan an problema sa droga pagtukaw ni Presidente Duterte bilang Presidente kan Pilipinas.

Ngonyan ta lang naaraman na bako lang duman sa Kamaynilaan o Metro Manila an gulpi nang adik o paratsungki kundi maski duman sa Cebu, Davao, Pampanga lakop na palan sa enterong Pilipinas na an biktima bako lang mga juvenes kundi pati mga gurang, dakulaon na pating negosyo na an embuelto an mga sindikato kundi naulakitan na pati mga politiko, judges, alkalde, governador, congressmen asin iba pang darakulang tao na nasa narcolist kan Malacañang.

Kadto ilegal na juego sana arog kan jueting an nag-iimpluwensiya sa resultado kan eleksyon, nag-abot an punto na an dakulang kuwarta sa likod kan ilegal na droga iyo na palan an pambakal nin boto kan mga tao o electorado.

Malala na, grabe na, dapat pondohon na. Iyan an naguin kampanya ni Presidente Duterte kan siya kandidato pa sana antes kan eleksyon kan 2016.

Alagad kan makatukaw na bilang Presidente asin pinunan niya na an kampanya kontra droga, nagka-igwa nin pagbabago sa direksyon kan kampanya kontra kriminalidad an gobyerno nasyonal, pinapusog an takyag kan Philippine National Police asin kan ibang ahensiyas de gobyerno tanganing paraon an droga sa manlaen-laen na barangay, banwaan, ciudad, provincia asin rona kan nasyon.

Rinibo an nagkadarakop, nagkaprereso, igwa man nagkagaradan kan ilansar an Operation Tokhang tanganing pauntokon an mga dorogista asin negosyante nin droga.

Sa naka-aguing tolong taon kan liderato ni Duterte daing ontok an kampanya alagad padagos man guiraray an pagburutwa nin mga illegal na droga, mga para gamit kaini, parabakal asin para-pabakal, may nagkakadarakop sa buy-bust operations, may nagkakakurulong, may nagkakabaradil gadan pero dai nauubos an supply kan illegal na droga kun saen hali-hali na naglalakop logod sa Luzon, Visayas, Mindanao.

Pati sa laog kan bilibid duman sa Muntinlupa, sa mga presohan sa Manila asin iba pang lugar sa laog kan preso padagos pa an transaksyon kan droga. An mga drug lords imbes na magsakit sa laog kan karsel garo enjoy logod kan saindang kamogtakan, padagos an transaksyon, padagos an pagpayaman.

Bako lang yan kundi pati palan mga pulis asin opisyales kan PNP kakutsaba pa kan sindikato sa droga na narisa sinda nagkakamal nin milyones pesos hali sa sindikato pero maski nagkabiristo garo pinatawad pa lugod kan mga nanunungdan.

Nagkaigwa nin kada-dakulang eskandalo an pig-aapod na Ninja Cops mala ta nagbunga ini kan puersahan na pagdemiter sa puwesto kan pinakahalangkaw na opisyal kan PNP.

Tinuyaw totoo kan oposisyon na pinapamayuhan ni Vice-Presidente Robredo na palpak an kampanya kontra droga kan presenting administrasyon kaya nag-init an talinga kan Presidente. Inapoint lugod si Robredo na maguin co-chair kan ICAD na maguin katabang kan hepe kan PEDEA sa paghapag kan mga kriminal na nasa likod kan illegal na droga.

Nabigla an nasyon, maski an opposisyon lalo na an administrasyon kan akoon ni VP Leni an appointment.

Mayong politika an gusto niya sana matabangan an gobyerno sa pag-untok kan illegal na droga sa Pilipinas alagad mayong garadanan, mayong “tokhang” pero dagdagan an fondo na paragastos kan dakulang operasyon.

Sige pa an karantiyawan, irintrigasan, irinsultuhan kan mga suportadores kan ambos-lados kan kampo ni Duterte asin kampo ni Robredo, panu-pano nin negatibong komentaryo an social asin mainstream media, na garo an gusto dai mag-asenso an programa na pondohon an droga sa Pilipinas.

Kun siring an mangyari, magana an sindikato kan illegal na droga, daog an gobyerno, daog an Pilipino, daog an tao. Kaya surugon ta si Duterte asin Robredo sa saindang kampanya kontra droga tangarig an ambos lados mangana sa dakulaon alagad magayonon na kampanyang ini kan mga nanunungdan sa gobyerno.

Mabuhay kita gabos! * * * Salamat sa dyos an jueting dai nadagos. O dai pa nadadagos. Nuarin daw? * * * Mag-antabay sa programang “INI AN TOTOO” kada Sabadong alas 9:30 nin aga (oras sa Pilipinas) sa OK Bangon FM, 97.5 KHZ/PBN TV 5, Caceres cable,Sky cable asin facebook live streaming worldwide. Program hosts: Winnie Ceas-Ventura and Ernie Verdadero.

May mga espesyal na bisita.

Diyos mabalos.

For comments/ reactions, please contact Cp nos. 09296281848/09613638409 or verdaderoernesto@yahoo.com/fb: Ernie Verdadero

Website: www.bicolmail.net