Pulis binadil kan alalay nin politico

Dawa bakong panahon nin politica dai nahahali an mga insidente nin pambabadil sa Masbate asin an pinakahuri naman na biktima iyo an sarong miembro kan Municipal Police Station kan Batuan, Masbate asin an suspechado pigpahayag na taohan nin politico.

Sa report nakaabot sa Camp Simeon Ola kan Bicol PNP, sinabi ni Police Major Malou Calubaquib an pinagbabadil si Police Staff Master Sergeant Oscar Alegada, 43 años, mantang yaon sa may highway kan Barangay Canvanez asin kaulay an nagkaperang miembros kan PNP kan biglang binadil asin dai pa aram kun anong kalibre nin armas.

An biktima dai nahaloy binawian nin buhay.

An incidente nangyari kan Martes na banggui asin sa inisyal na imbestigasyon kan Butuan Municipal Police Station, pigtutukdo kan testigos an suspechado na pigngaraanan na si Ali Llabres alyas Butchoy, na taga barangay Royroy.

Pig-aaram pa kan pulisya an posibleng motibo kan krimen huli ta an suspechado pigpahayag na bodyguard ni dating Alcalde Charmax Jan Yuson.

Nakatalikod kan badilon an biktima kan suspechado alagad dai pa maaraman kun anong kalibreng armas an ginamit sa panghihipa.

Si Acting PNP Regional Director Brig. General Anthony Alcaneses nag-orden para sa manhunt operation sa suspechado na armado asin taohan nin dating politico sa Masbate.