SA CASURECO II: Consumedores makikinabang kan onra sa “Triple A” sabi
Bako lang sa onra envez dakulang paktor sa pagpa-angat nin serbisyo sa miembros-consumedores an sarong cooperativa nin electricidad kun declarado kan National Electrification Administration (NEA) bilang Triple A.
Si OIC General Manager Emelita Candia kan Camarines Sur II Electric Cooperative (Casureco II) nagpahayag sa entrevista kan Bicol Mail na kabali sa kriterya nganing matawan nin onra bilang Triple A, dapat igwang hababang system loss (SL), halangkaw na collection efficiency, serbisyo sa technical maging sa institutional.
Mandato kan NEA na dapat sagcod sana sa onse por ciento an system loss alagad sa presenting manijamiento kan OIC GM nasa diez por ciento sana, huli kaini mayong pinapasang dugang na singil sa tarifa sa consumedores, sabi pa ni Candia.
Sa cada dugang na on por ciento sa SL nag-aabunar an cooperativa nin dos milyones pesos bulan-bulan asin ipinapasa man sa consumedores sa paagi kan power bill alagad sa ngonian mayo na ini.
Dakulang bagay sa finansya kan cooperativa huli ta mayo nang subsidia sa SL envez an dos milyones pesos pueding maging proyecto para sa miembros-consumedores asin maintenance sagcod pagpakarhay kan mga electrical post maging mga linya nganing maibitaran an halawig na mga brownout.
Sa collection efficiency, an halangkaw na score na 97 por ciento na iyo an pigpakong standard kan NEA na resulta kaini igwang awad-awad na fondo nganing makabayad nin amay sa saindang power supplier asin an bueltada digdi igwang tinataong tres por cientong prompt payment discount.
Sinabi pa kan OIC GM an discuento mandato kan Energy Regulatory Commission na pigbubuelta sa consumedores sa paagi nin rate reduction sa tarifa sa kuryente.
Ano man na bueltadang discuento asin pagbaba kan SL, an fondo nagagamit sa pagpakarhay kan mga linya lalo na sa relokasyon kan mga poste.
Maging pagbakal nin bagong electrical post nganing ribayan an mga naglalapa nang mga poste.
Dawa OIC General Manager padagos niyang namamantenir an Triple A alagad ini huli sa cooperasyon kan mga empleados, opisyales kan cooperativa kabali na digdi an mga miembros kan junta directiva. (dpa)