ECs mandato kan NEA dapat igwang plano sa calamidad

An gabos na electric cooperatives (ECs) mandato kan National Electrification Administration (NEA) na magpanday nin disaster risk reduction plan base sa Republic Act 11039 na mas midbid sa ‘’An Act Institutionalizing Electric Cooperatives Emergency Resiliency Fund’’ nganing makaaprobetsar nin calamity assistance sa gobierno nasyonal alagad sa Camarines Sur II Electric Cooperative (Casureco II) nagseguro na saindang isusumiter sa NEA sa bulan nin Deciembre 2019.

Si Director Angelo Cornelio Jr. kan Naga North District nagsabi na nagpaluwas nin kasugoan an NEA na magsumiter kan mga minasunod; Resiliency Compliance Plan (RCP), Vulnerable and Risk Assessment (VRA), asin Emergency Response Plan (ERP).

Perming may homa nin calamidad sa Bicol na mahalaga sunodon kan manijamiento kan Casureco II asin kun magpalyar na makasumiter kan sinambit na plano dai matatawan nin calamity assistance kan NEA.

Sa ngonian nagcoconsulta na an Casureco II sa Naga City Disaster Risk Reduction Management Council na pinamamayohan ni Ernesto Elcamil nganing i-adaptar an ibang mga programa kan lokal na gobierno na puedeng iimplementar kan manijamiento sa cooperativa.

Sa pig-isyung Memorandum kan NEA (No. 2019-015) an gabos na ECs pigmamandohan na estrictong sunodon an ley asin an implementing rules and regulation na inaprobaran kan Hunyo 29, 2018 asin Deciembre 14, 2018.

Kun nagkakaigwa nin makusog na bagyo dakula an destroso sa mga linya kan cooperativa siring kan mga nakaaging bagyo na kinakaipuhan pang mag-utang fondo sa NEA.