Grupo nin kababaihan vs droga

Lakas ng kababaihan asin Mothers Against Drug Abuse sa tercer distrito kan Camarines sur nag uurulay kan saindang gigibohon na advocacia laban sa droga bilang suporta ki VP Leni Robredo, co-chair kan ICAD (dpa)

An Lakas ng Kababaihan Federation (LKF) asin Mothers Against Drug Abuse (MADA) sa tercer distrito kan Camarines Sur nag-asegurar nin suporta ki Bise Presidente Leni Robredo bilang co-chair kan Inter Agency Committee on Anti-Illegal Drugs (ICAD) asin nagtutubod sinda na kakayahon kan bise presidente saiyang bagong trabajo.

Si Malou Alanis, president kan LKL asin lider kan MADA nagpahayag na kaipuhan suportaran ninda an Bicolanang bise presidente mantang saro sa prioridad kan administrasyon Duterte iyo an giyera laban sa droga.

Sinda nag-miting kan nakaaging aldaw matapos maghampang sainda si Robredo na hinahagad na susteniran an campaña sa droga bako lang sa ibang actividades.

Nagkaigwa sinda nin workshop nganing pakusogon an campaña sa droga sagcod sa mga barangay.

Kaipuhan an suporta kan mga Bicolano ki Robredo sa campaña sa droga sa tahaw kan dakul na mga kritiko contra sa saiya sa ICAD huli sa politica na mga kaalyado ni Duterte, sabi pa.

An LKF asin MADA liwat aatubangon kan bise presidente nganing haduyon kan saindang mga plano asin aramon si kamugtakan kan mga dating nagsuko sa awtoridad na nagpapangako dai na magiging envuelto sa ilegal na droga.

Matapos kan miting ni Robredo sa grupo nin kababaihan, nag-atubang sa entrevista kan prensa asin pinahayag kaini na nakasumiter na siya ki Presidente Duterte kan enot na report.

Sinabi kaini, na siya pignombrahan bilang co-chairman kan ICAD, alagad an saiyang trabajo envuelto an paghaman nin mga pulicia asin mayo siyang superbisyon sa PNP asin sa iba pang departamento kan gobierno nasyonal.