Leni Na?
Gusto kong magtubod na padangat ni Digong an Bicolandia lalo na an Bicolanang Vice-Presidente na si Leni Robredo.
Labi na lang duwang taon an natatada sa turno ni Presidente Rodrigo Duterte pero an perming laman kan mga dyaryo nasyonal, sa mga banner headlines saka mga columns asin editorials an pangaran ni VP Leni. Kan nombrahan siyang co-chair kan ICAD tanganing maguin katabang kan administrasyon sa giyera kontra droga, naguin importanteng figura sa politika an biyuda kadtong depuntong DILG Secretary asin Naga City Ex-Mayor Jessie M. Robredo. Maski ano pang sabihon kan mga kritiko ni Leni asin kan mga kasurog kan Duterte administration, si Leni duminakula nang marhay asin naguin importante sa isip kan milyones na Pilipino.
An mga Bicolano halop asin perming naghaharamay an tulak na magka-igwa man lamang nin hefe-ejecutivo na hali sa Kabicolan.
Pinaka-ultimong pangaturogan kan mga Bicolano na maguin Presidente iyo idtong Raul Roco, an pigsasabing “the best President the Philippines never had”. Kasagsagi kan kampanya nagkahelang siya asin binawian nin buhay.
Enot pa ki Roco, naguin matanog kadto an ngaran ni Senador Dominador “Bading” Aytona kan Albay (alumnus Kan Cam Hay) alagad dai man sinuwerte.
Pinaka-enot idtong Wenceslao Q. Vinzons Sr. nag-gobernador asin congressman kan Camarines Norte, naguin Con-con delegate kan 1935 Constitutional Convention, pinakasikat na student leader asin editor kan Philippine Collegian sa U.P., may kaisipan na sararuon an Malay race arog kan mga Pilipino, Indonesians and Malaysians na maguin sarong nasyon-(Malaya-Iredenta) asin pinaka-matibay na leader nin guirella kan tiempo Hapon, dai nagsuko sa mga Hapones mala ta ginadan siya, inilubong kun saen mala ta maski tulang niya dai nakutkot sagkod ngonyan na panahon. Luminaban siya sa prinsipyo kun pano maguin independiente an Pilipinas kontra ki Presidente Manuel Luis Quezon asin an saro sa mga sigedores niya sa U.P. iyo mismo si depuntong Senador Arturo M. Tolentino.
An Bicol bistadong opposisyon lalo na kan panahon ni Marcos particularmente kan snap elections kan 1986. Antes kan Edsa Revolution kan February 25 kan kaparehong taon nagka-igwa nang silensyong pagprotesta an mga Bicolano sa laog kan Capitolyo Provincial kan Camarines Sur sa pagduda na dadayaon kan Kilusang Bagong Lipunan an pirilian na pabor ki Marcos.
Nagsunod na lang an Edsa Revolution duman sa Metro Manila.
Kan Batasan Election kan 1984 nagpaheling na an mga Bicolano nin pagkontra sa administrasyon ni Marcos kan paganahon ninda an Apat na Aguila (Luis Villafuerte, Edmundo Cea, Boboy Alfelor asin Lando Andaya) kontra sa pig-aapod na Apat na Uwak kan KBL(Noli Fuentebella, Juancio Trivinio, Lorenso Ballecer, asin Salvador P. Bigay).
Alagad maski may pig-aapod na Bicol Bloc sa Kongreso asin may mga darakulang lideres sa Bicol arog ki Jose Fuentebella, Felix Fuentebella,Noli Fuentebella, Ramon Felipe Jr., Luis Villafuerte, Joey Salceda Marcial Pimentel, Esmeraldo Eco, Juan asin Jose Alberto, Juan Frivaldo,Macario Peralta, Emilio Espinosa Jr., Carlos Imperial asin iba pa alagad dai nungka nagkakaburunyog o nagkakasararo kaya watak-watak an mga Bicolano. Dai nakakaproducir nin sarong lider nasyonal. Kan manggana si Leni kan 2016 bilang Vice-Presidente kan Republika, siya na an pigtitingag kan saiyang mga kahimanwa bako lang bilang lider kan mga Bicolano kundi sarong lider nasyonal.
Bilang Vice-Presidente asin chairman kan Liberal Party o Opposition siya an nangenutan sa kampanya para sa senado kan mga kandidato kan Otso-Deretcho na nanggana sa enterong Kabicolan kontra sa mga kandidato kan administrasyon.
Duman naheling an pwersa ni Mrs. Robredo bilang lider kan Opposition.
Gabos na tuyaw niya sa administrasyon sinisimbag mismo ni Presidente Duterte o kan saiyang kapwa Bicolano na si Presidential-spokesman Sal Panelo.
Sa pag-ako niya kan puwesto bilang ICAD co-chairman na sabi niya mayong politika pero nagkusog lugod an saiyang estatura sa kinaban nin politika.
Nagbuburutwa na an mga pangaran kan mga presidentiables sa 2022 poon ki Sara Duterte, Manny Paquiao, Ping Lacson, Grace Poe, Cynthia Villar saka si Isko Moreno pero kun an election gigibohon ngonyan na panahon o sa 2022 nakakabintahe na si Mrs. Robredo ta an saiyang pangaran iyo na an pinaka-matanog sa enterong nasyon.
Kun totoo an huring-huding na amayon pa na may dai-pagkakairintindihan si Mayor Nelson Legascion asin si ex-Mayor John Bongat huli sa color kan merkado publiko, asul kontra yellow, pangaran kan merkado Peoples Mall vs Naga City Supermarket asin kan Battle Cry kan ciudad “Naga City Smiles” vs “Naga na, Bangon na”, lugui sindang duwa. Baka pareho sinda mawaraan taya sa 2022.
Baka mas juven, mas mayaman pa sa duwa bakong lalaki, baka may mas mahamot na pangaran sa Naga an masunod na pamayo kan City Hall.
Mag-antabay sa programang “INI AN TOTOO” kada Sabadong alas 8 30 to 930 nin aga (oras sa Pilipinas) sa OK Bangon FM, 97.5 KHZ/PBN TV 5, Caceres cable,Sky cable asin facebook live streaming worldwide. Program hosts: Winnie Ceas-Ventura and Ernie Verdadero.
May mga espesyal na bisita.
Diyos mabalos.
For comments/ reactions, please contact Cp nos. 09296281848/09613638409 or verdaderoernesto@yahoo.com/fb: Ernie Verdadero
Website: www.bicolmail.net