Limang congressional dist sa CSur uukagon
Calabanga, Camarines Sur – kasunod kan mga pagkontra kan ibang mga alcalde asin bise alcalde sa tercer distrito kan Camarines Sur sa propuestong pabanga kan distrito ni Congresista Gabby Bordado nagbagong desisyon an Sanggunian Bayan sa banwaan na ini envez an entero nang distrito uukagon nganing gibohon nang pitong congressional district an Camarines Sur.
An resolucion aprobado na kan Sangguniang Bayan na padreno si Consejal Levy Sta. Ana asin pinaboran ni Alcalde Eduardo Severo.
Ipinahayag na an bagong resolucion apektado an limang congressional district kan CSur asin magdedepende na sa congreso an pagbanga kan mga banwaan sa pitong distrito.
Magigirumduman sa ginibong sesyon regular kan SB Calabanga kan Septiembre 9 inaprobaran an resolucion na padreno si Sta Ana na saro sa rason para sa pag-uswag kan mga banwaan sa ngaran na economia kun ma-rerealisar an reapportionment .
An propuesto may titulong ‘’A resolution requesting the House of Representatives and the Senate of the Philippines to Reapportion the 3rd Congressional District in the province of Camarines Sur’’.
Si Congresista Bordado dai man nagpahayag nin pagpabor asin pagcontra envez ipaubaya sa magiging desisyon kan namamanuan sa saiyang distrito.
Alagad sinda Alcalde Tomas Bongalonta Jr. kan Pili, Camarines Sur asin Alcalde Yepyep Senar kan Magarao, Camarines sur asin iba pang opisyales lokal anas nagpahayag nin pagcontra huli sa political accommodation sana.
Sinabi kan duwang ejecutivo kun gustong bangaon an presenting congressional district, dai sinda magsusuporta envez an entero lugod na limang distrito asin iparejas an populasyon cada distrito.
Nagtutubod sinda Bongalonta asin Senar asin iba pang opisyales lokal kan distrito na kaya kan presenting nagtutukaw na Congresista Bordado an saiyang nasasakopan na mga banwaan.
Sa enot na propuesto kan SB an macompuesto nin municipalidades iyo an Ocampo, Pili asin Ciudad nin Naga asin an bagong congressional distrito iyo an Calabanga, Bombon, Magarao, Canaman, Camaligan. (dpa)