Oplan tukhang bubuhayon
Bababalikan giraray kan Philippine Drug Enforcement Agency (PDEA) si mga dating drug surenderers na padagos man giraray kan saindang pagiging envuelto sa droga mala ngani dakul na sa sainda an nagkadarakop asin kinasohan sa pagsinutil sa Republic Act 9165 o mas midbid sa Comprehensive Dangerous Drug Act of 2002.
Ini an patanid ni Assistant Provincial Officer Rodel Abina kan PDEA Camarines Sur nganing liwat pakusogon an paglaban sa operasyon sa droga dawa nagkapera nang mga barangay sa CamSur asin Ciudad nin Naga na declarado na bilang drug cleared barangay.
Si Liga ng mga Barangay President Antonio Beltran asin ex-officio member sa Sangguniang Panlungsod kan Ciudad nin Naga nagpahayag sa Bicol Mail na sa ginibong miting ninda kan nakaaging Miercules naging bisita an opisyal kan PDEA sa provincia asin nagkumfirmar na ipapadagos ninda an ‘’Oplan Tukhang’’.
Sinabi ni Beltran na si enot na rangkada kan mga awtoridad sa Oplan Tukhang na saindang suportado asin nagkaigwa nin epekto mala ngani kadakul an mga nagsuroko huli kan giyera sa droga kan administrasyon ni Duterte dai nasusteniran sagcod nang dagos nag-‘low bat’’.
Oplan Tokhang ipapadagos kan PDEA Camarines Sur. (ICPO/FB)
Sa enot na anom na bulan sa Malacañan ni Presidente Duterte labo-labo an Oplan Tukhang alagad sa ngonian naglaylo an awtoridad na nakatalaan ibuelta kan PDEA.
Sa miting ni Bise Presidente Leni Robredo sa mga opisyales de barangay kan Sabado, Noviembre 16, hinahagad kaini na dapat dai maging ningas kugong an campaña sa ilegal na droga. Saiyang sinabi na naglangkaw an caso kan droga sa ciudad nin huli ta ginigibo ining bagsakan kan droga mantang iyo an transshipment huli ta an Naga iyo an pinaka-centro kan rehiyon Bicol.
Dinagdag man ni Beltran na ginigibo sanang lugar nin transaksyon sa droga an ciudad kun milyon-milyon pesos na cantidad na nakukumfiscar kan PDEA asin PNP alagad an mga nagkakadarakop bako man residentes kan ciudad mantang digdi sana nagtataragpoan.
Sa saindang evaluasyon pag-abot sa barangay level tingi-tingi nalang an barakalan sagcod nadadakop.
Sa katorceng parametro nagkapera nang an dapat ma-comple nganing kadakli sa mga barangay digdi maging drug cleared.
Sa viente sieteng barangay anom digdi an declarado na bilang drug cleared kinababalihan kan Santa Cruz, Bagumbayan Norte, Liboton, Dinaga asin Carolina. (DPAureus)