Salceda mayong kalaban sa reg’l PCL election

Nagrarani na an regional election kan Philippine Councilors League (PCL) na pigtalaan sa Noviembre 27 alagad sagcod sa ngonian mayo pang kalaban si Vocal Jiescel Richard Salceda bilang pamayo kan Liga digdi sa Bicol.

Si Salceda, pariente ni Congresista Joey Salceda kan tercer distrito kan Albay naglibot na sa mga PCL sa Ciudad nin Naga asin Camarines Sur nganing saiyang ikampanya an sadiri alagad sa ngonian mayo pa siyang kalaban.

Siya ex-officio member sa junta provincial kan Albay na nagrerepresentar kan PCL nagpahayag na saiya nang nalibot an anom na provincia sa Bicol asin saiya nang nakaulay an mga gobernador na nagpahayag nin suporta sa saiya.

Saiyang sinabi na an PCL Bicol mayong gayong punsyon alagad kun igwang mga programa kaipuhan man giraray desisyonan kan Liga bako lang hali sa saiya.

Alagad an PCL kun igwang mga panindugan napaluwas sinda nin manifesto sa nagkaperang mga isyu lalo na kun makaka-apektar sa mga lokal na lehislador.

Dinagdag pa kaini, na kabali sa saiyang paglibot-libot sa mga PCL sa Bicol saiya man pigcacampaña si Consejal Mila-Raquid Arroyo na suportaran sa ambisyon kaini na maging auditor kan PCL national. (dpa)