X-ray machine kaipuhan na sa mga bus terminal - Leni
Kun igwang X-Ray machine an mga eropuerto, kaipuhan magbugtak naman kaini an mga bus terminal nganing dakulang bagay sa pag-monitor sa ilegal na pigtatransportar na droga.
An pampasajerong bus saro sa ginagamit sa pagtransportar nin ilegal na droga asin tanganing maulang an mga transaksyon na ini maninigo an X-Ray machine sa mga bus terminal.
Ini an mga pahayag ni Bise Presidente Leni Robredo sa prensa sa Ciudad nin Naga sa saiyang pagbisita digdi matapos tukahan ni Presidente Rodrigo Duterte bilang co-chairperson kan Inter-Agency Committee on Anti-Illegal Drugs (ICAD).
Sinabi ni Robredo na dakula an problema sa droga sa Bicol kan siya Congresswoman pa kan tercer distrito kan Camarines Sur asin iyo pa an Regional Advisory Board kan Bicol PNP na saro sa problema sa rehiyon iyo an droga.
An nagkaperang mga ciudades sa rehiyon Bikol kabali sa nagiging transshipment nin ilegal na droga.
Alagad sa ngonian kulang pa siya nin datus mantang dai palang siya nahahaloy sa puesto sa ICAD.
An PDEA asin Naga City Police Office nagkapera nang veces nakadakop kan pigtatransportar na ilegal na droga sa Bicol Central Station (BCS).
Si Consejal Joselito Del Rosario, pamayo kan Committee on Public Safety nagpahayag na dapat magkaigwa nin higot na seguridad sa BCS bilang pag-andam kan lokal na gobierno sa celebrasyon kan panahon nin Pasko.
An pag-implementar nin bagong mga plano sa seguridad sa BCS makakatabang sa bagong posisyon ni VP Robredo bilang Co-Chairman person kan ICAD nganing maulang an ano man na pagprobar na magpapulsit nin ilegal na droga sa terminal, sabi pa ni Del Rosario.
Kabali sa pigrerecomendar kan consejal na bugtakan na nin X-Ray machine an bus terminal nganing ma-monitor an pagpalusot nin mga kontrabando.
Si Roderick Reforsado, General Manager kan BCS nagkumfirmar na ngonian na maabot na Deciembre iyo an peak season na kun haen ribo-ribong pasajeros digdi na inaabot nin 24 mil hasta sa 38 mil.
Saiyang pig-rerecomendar sa City Hall na magbugtak nin CCTV cameras sa importanteng lugar lalo na entrance asin exit.
An presenting mga nakadestinong security personnel kulang sa saindang facilidad nganing ipasunod an higot na seguridad. (dpa)