Bicol Politics
O politika sa Bicol asin sa enterong Pilipinas.
Kaidtong panahon simple an kahulugan kan politika sa mga ordinaryong namamanwaan; Pupotikan ka, lilintianan ka, titikason ka, kakakanan ka pa. Mayo pa kaidtong SOP. Mayo pang vote buying.
Alagad ngonyan iba nang marhay, modern na.
An politika sa nasyon lalo na sa rehiyon Bicol magastos asin pralastikan.
Pamalo-malo, saguin-saguin, kwarta-kwarta sana.
Kadto igwa pang tribuna kun sain an mga politico mina-disarulyar kan mga isyu asin mina-presentar kan mga plataporma y programa de gobyerno.
Ngonyan mayo nang diskurso o miting sa plasa. Kun igwa man dikit na an tao asin dai pigdadarangog an kandidato, pigdadalan lang an mga parakanta asin pigheheling an mga parabayle na nag-iikol-ikol sa ibabaw kan entablado.
Money talks na ngonyan sabi kan mga politiko. ATM pero bakong at the moment kundi Automatic Tellering Machine kun sain pigdedeposito asin pigwiwithdraw an pambakal boto. Saka an may pinaka-makusog na boses an mass media, tv asin radio, an social media, (facebook, twitter, asin instagram), bako nang gayo an diyaryo o periodiko ta mapagal magbasa an mga botante.
Mayo nang house-to-house campaign o pagharong-harong, kun mag-abrasa man may paipit na kwarta sa palad na minabalyo na hali sa kandidato na pasiring sa paraboto.
Si dating ugali kan panahon na kun ika anggot o dai mo suno an sarong tao politikahon mo sana ngaya. Maski ka anggot dai ka magpaheling na anggot, maski ka suya dai ka magpaheling na uyam ka, kugusa an kalaban, taptapa an likod na dai niya aram na igwa kang daga na pweding isaksak sa saiyang likod. An importante manggana sa eleksyon. An dakulang gastos babawion na lang pag nakatukaw na sa pwesto. Asin garo negosyo baka mas ganansiya o delinsiya pa na pwede nang paragastos sa masunod na eleksyon.
An pig-aapod na performance o naginibohan baliwala sa mga tao asin mismo sa mga politiko.
An importante, an mahalaga, an nababasa o naheheling sa mga darakulang tarpaulin, streamer asin billboard na nagpapaheling kan mga darakulang retrato kan mga politiko.
EPAL o parapelan. An mga pangaran kan politiko o dinastiya nasa waiting sheds, lanob, kudal, pati atop kan mga eskwelahan. Igwa pa ngani nin bagtingan na may pangaran.
Kun iisipon mayong pagkakaiba an mga EPAL kan mga politiko sa mga grafiti kan mga militante asin aktibista.
Sa bagay bako man lang kayang politiko an may sala kundi an mga tao mismo na nadadara sa buladas kan mga kandidato.
Dai na ma-tolong taon matapos na an turno kan presenting administrasyon , mapili naman kita nin mga mayor, gobernador, congressman, senadores, vice-presidente asin presidente mismo.
Si mga pangako nakapako. Mayo man pagbabago. Pigpapaitok-itok lang an enterong nasyon sa palad kan mga politiko asin mga poderoso.
Alagad susog sa huring-huding, kun mangyari an bagay na mag-kaigwa nin pagbabago an presenting Konstitusyon asin magka-igwa nin sistemang federalismo an gobyerno susog sa kampanya ni Prisedente Digong Duterte kan 2016, mabago an daralagan kan politika sa Pilipinas asin digdi sa Bicol.
Tibaad pati lalawgon kan mga lideres asin politiko magbarago man.
An posibleng federal State kan Bicol sadit sana na may anom na provincia asin pitong ciudades. May duwa sanang pangaran an naglalataw ngonyan hali sa Albay asin Camarines Sur an pwedeng mamayo kan bagong estado. Kontrolado na pati ninda an media sa Legaspi asin sa Naga .
Pwede man an Bicol kakanon kan mas dakulang Federal State of Southern Luzon na kabale an provincia nin Quezon.
Diyan magkakairigwa nin tunay na pagbabago an mga lalawgon.
Ipangadye ta mangyari man lugod. * * * Lalong naglalala o nag-gragrabe an siriltikan sa ciudad nin Naga. Lambang lado nagsasala na igwa na nin “Basol Boy”. Mayo nag ibang gibo kundi magbarasolan an pressente asin naka-aguing administrasyon.
An tunay daang magka-iwal bako an mga lalaki kundi mga partner nindang mga babae. Piggagatongan pa man kan sarong negosyante na nadaog pagka-alkalde kan naka-aguing pirilian. * * * Mag-antabay sa programang “INI AN TOTOO” kada Sabadong alas 8:30-9:30 nin aga (oras sa Pilipinas) sa OK Bangon FM, 97.5 KHZ/PBN TV 5, Caceres cable,Sky cable asin facebook live streaming worldwide. Program hosts: Winnie Ceas-Ventura and Ernie Verdadero.
May mga espesyal na bisita.
Diyos mabalos.
For comments/ reactions, please contact Cp nos. 09296281848/09613638409 or verdaderoernesto@yahoo.com/fb: Ernie Verdadero
Website: www.bicolmail.net