ISYU SA RICE TARIFFICATION LAW: Ayuda bakong pautang

Isinisikwal kan sektor nin paraoma sa Camarines Sur an pinapautang na P15 mil pesos alagad kun matabang an gobierno dapat subsidiya an kaipuhan nin huli ta padagos nalulugi sa baratong presyo kan paroy epekto kan Rice Tariffication law.

Ini an pangapudan sa Departamento de Agricultura (DA) kan Amihan Organisasyon ng Kababaihan Magsasaka na pinamamayohan ni Tess Cielo nin huli ta nalulugi na ngani mantang dakula an saindang production cost alagad bagsak an presyo kan paroy.

Dawa sabihon pa kan DA na utay-utay na babayadan sa laog nin walong taon an pinapautang, madidificilan man giraray makabayad mantang lugi na ngani sa presyo kan paroy.

Sinabi pa ni Cielo na pinapayaman sana ni Presidente Rodrigo Duterte iyo an rice traders nin huli ta nakakamiobra kan presyo kan bagas na saindang inaangkat.

Nagtutubod an Amihan na dai kaipuhan na mag-angat nin bagas an Filipinas mantang agricultura an satong nasyon dapat pundohon na an rice importation asin digdi mayong ginigibo an gobierno nganing mag-asenso an sektor nin paraoma.

Hinahagad na kan saindang organisasyon bako lang digdi sa Bikol maging sa nasyonal na an solusyon sa padagos na pagbagsak kan presyo kan paroy maninigo nang ibasura an Rice Tariffication law.

Sa ngonian an dalagan kan presyo kan paroy nag-aabot na sana sa P10 hasta P12 alagad an presyo kan bagas sa mercado dai man nagbababa envez halangkaw man giraray, sabi pa kan Amihan.

An gobierno nasyonal andam magpalugi nin P2 bilyon nganing ibakal kan paroy nin paraoma sa paagi kan National Food Authority (NFA) na mas halangkaw an presyo na nag-aabot sa P19.

An reaksyon man kan paraoma temporaryo sanang solusyon ini envez an hagad ninda an permanenteng ayuda asin ibasura na kan congreso an Rice Tariffication law, sabi pa. (DPAureus)