Sarong banwaan sa Cam Sur declarado na bilang drug cleared

Gainza, Camarines Sur – Dawa sadit na banwaan alagad urgulyo kan local na gobierno asin Municipal Police Station digdi na pigdeclara na kan Lunes bilang drug cleared an saindang walong barangay.

Si P/Lt. Leo Sabas, jefe de pulisiya kan Gainza MPS nagsabi na pasado sa gabos na kriterya nganing ideclara na drug cleared an saiyang area of responsibility, ini narealisar huli sa pagtarabangan kan LGU, opisyales de barangay asin kan comunidad.

Ini an pinakapremirong municipalidad sa Camarines Sur na drug cleared na urgulyo man ni Provincial Director Col. Roderico Roy asin Philippine Drug Enforcement Agency (PDEA) puon na magdeclara si Presidente Rodrigo Duterte an giyera laban sa droga tolong taon na an nakakaagi.

Ipapadagos kan MPS an saindang misyon na dai na makalaog an mga drug pusher sa saindang AOR matapos igwa na sindang nakumfiscar na droga na maabot sa on milyon pesos an street value alagad an mga suspechado mga dayuhan.

Si Roy asin opisyales kan PDEA nagbisista sa LGU Gainza asin sa MPS bilang suporta tanganing magdanay na mayo nang envuelto sa droga sa sadit na banwaan na ini na igwa sanang walong barangay.

Sa 35 mga banwaan asin duwang ciudades sa Camarines Sur maabot pa sana sa cuarenta an declaradong drug cleared barangay.

Sa Ciudad nin Naga na igwang veinte sieteng barangay anom pa sana an mayo nang problema sa droga.

Hinahagad kan Provincial Director sa ibang mga MPS na maging maigot sa saindang campaña sa ilegal na droga nganing sinda naman an masunod na ideclarang drug cleared.