VP Leni dai masibog sa paglaban sa droga


URULAY SA MADA. Nagdadangog si VP Leni Robredo sa mga pinapaabot na report kan mga opisyal kan Mother Against Drugs Abuse sa mga ginibong programa laban sa ilegal na droga sa Camarines Sur. (DPAureus)


Nanindugan si Bise Presidente Leni G. Robredo na ipapadagos niya an paglaban sa ilegal na droga dawa sinipa bilang co-chairperson kan Inter-Agency Committee on Anti-Illegal Drugs (ICAD).


Sarong aldaw matapos halion siya sa ICAD pigbisita niya an Drug Rehabilitation Center sa San Fernando, Camarines Sur nganing helingon an kamugtakan kan mga pasyente sagcod kinaulay an opisyales kan Department of Health sa saiyang pigtutulod na programa sa Community Rehabilitations.

Sunod na aldaw pig-miting an Mother Against Drugs Abuse (MADA) sa Camarines Sur nganing aramon an datus sa mga dating nagsurokong envuelto sa droga na saro sa pigtawan nin punto na bako lang magtapos sa numero kun pera an drug surrenderees envez kun ano an ginibong intervention kan gobierno asin ano na an saindang kamugtakan.

Sinabi ni Robredo na magpapadagos asin nagpupuon pa sana siya kan mga ginigibo contra sa problema sa droga sa nasyon. Alagad igwang patanid na igwa pa siyang ibubuyagyag sa mga nadiscobre kan nagpupugol pa nin posisyon sa ICAD.

Siya nagtukaw sa ICAD sa laog sana nin 19 diya, alagad sinabi pa kaini na ‘’Noong tinanggap ko an trabajong ito, ang una kong tinanong sa kanila ay, ‘handa na ba kayo sa akin?’’ Ngayon, ang tanong ko, ano ba ang kinatatakutan niyo?’’ sabi pa sa press statement.

‘‘Ano ba ang kinatatakutan ninyong malaman ko? Ano ba ang kinatatakutan ninyong malaman ng taungbayan? ‘’ hapot niya pa.

Sa kaparejong miting sa MADA, sinabi pa kan bise presidente bilang mga Ina dapat magtabang sa problema sa droga asin dai puedeng magsabi na bahala na an PNP.

Papakusogon niya pa an organisasyon kan Barangay Anti Drug Abuse Council (BADAC) nganing magtarabangan sinda kan MADA sagcod kan programa sa community based rehabilitations sa mga barangay.

Dinagdag pa ni Robredo dawa sinipa na siya sa posisyon, alagad dai puedeng mahali kan administrasyon an saiyang determinasyon na mapundo an nangyayaring garadanan asin may sisimbagon sa ley an siisay man na responsable.

‘‘Kung sa tingin nila matatapos ito dito, hindi nila ako kilala. Nagsisimula pa lang ako.’’

Kan Noviembre 19 sinabi ni Presidente Duterte na mayo siyang tiwala ki Robredo huli ta miembro kan minoryang Liberal Party asin an ginibo kaining imbitasyon sa sarong dayuhan na prosecutor.

Alagad sinabi sa atubangan kan miembros kan media ni Robredo, ‘’Mr. President, hindi ko hiningi ang posisyon ito. Pero sineryoso ko ang trabajong ipinasa niyo.’’ (DPAureus)