Tabang finansyal, makinarya simbag sa mga apektado kan Tarrification law

Dawa hinahagad kan sektor nin paraoma na ibasura na an Rice Tarrification Law o Acta Republika 11203 alagad padagos an mga ginigibong interbensyon kan Departamento de Agricultura (DA) bako lang sa finansyal envez maging sa farm mechanization.

Sa ginibong media briefing sa Ciudad nin Naga na may temang ‘’Quality Rice, Quality life’’ na padreno an DA Bicol pigpaliwanag ni regional spokesperson Emily Bordado na kabali digdi iyo an saindang pagpautang nin P15 mil pesos na dakul na an nag-aaprobetsar asin ayudang P5 mil na cash.

An pautang na P15 mil babayadan sa laog nin walong taon asin mayong ipapatong na interes asin libre o tabang na an cash na P5 mil.

An mga benepisyaryo kaini iyo si paraoma na may sarong hektarya pababa mantang an listahan kan mga pangaran kan paraoma yaon na sa Municipal Agriculturist kan LGUs.

Yaon man an suporta kan National Food Authority (NFA) sa paagi kan pagbakal nin paroy sa presyong P19 cada kilo mala ngani aroaldaw halaba an nagpipilang mga paraoma sa mga bodega kan NFA nganing digdi na magpabakal kan saindang inaning paroy envez sa mga pribadong kumprada na bagsak an presyo.

Sinabi pa kan DA Bicol na kaayon sa saindang programa iyo an ‘‘farm mechanization’’ na pig-aadaptar na ngonian kan paraoma bilang estratihiya nganing mapalangkaw an produksyon asin ingreso.

An hababang production cost dakulang bagay sa pagkulang-kulang nin trabajador sa panahon nin uromahan.

Dinagdag pa kan DA sa lindong kan programa sa Rice Tarrification Law nagkaigwa na nin Rice Comprehensiveness Enhancement Program (RCEP) na nag-aalokar nin diez bilyon pesos cada taon asin sa masunod na anom na taon, sundo sa 2024 nganing maglangkaw an saindang produksyon.

Sa P10 bilyon, an P5-B para sa farm mechanization, P3-B gagamiton man na kapital sa banhi, P1-B para sa credit support asin P1-B para sa training/seminar kan mga paraoma. (DPA)