Environmentalists binabasol sa destroso sa Casureco II


PUON NIN KAHOY PINATUMBA NI ‘TISOY’. Nasa tahaw kan national road sa brgy. San Felipe, Ciudad nin Naga nagtatarabang an ENRO, DPWH, SWMO, asin SARU nganing putolon asin maagihan mga vehiculo. (rene abiada/SARU)


Pagpabulos kuryente tataposon antes kan pasko


Nagdeclara na nin state of calamity an City Hall matapos kan bagyong ‘Tisoy’ alagad binabasol an grupo kan environmentalists na nagcontra sa pagpurotol nin kahoy na naging causa kan dakulang destroso sa mga poste asin primary line kan Camarines Sur II Electric Cooperative (Casureco II) sagcod naging dahilan kan halawig na brownout.


Ini mga pahayad ni Alcalde Nelson Legacion sa atubangan kan mga empleados asin department head kan lokal na gobierno antes kan saindang clean-up drive kasoodma (Deciembre 4) sa centro kan ciudad nganing mahali tolos an mga winalat na basura kan bagyo.

Haloy nang nanindugan an ciudad nganing tawan nin buelo an road widening project kan Department of Public Works and Highways (DPWH), dapat putolon na an kahoy na yaon sa laog kan road right of way.

Pig-ehemplo kan jefe ejecutivo si nagkaperang mga puon nin kahoy sa barangay San Felipe na nagkaturomba asin tuminama sa poste asin primary line kan Casureco II, kabali sa destroso si kable kan telcos asin cable television.

Sa miting kasoodmang hapon sa Peace and Order Council (POC), saro sa saindang urulay-ulay ano daw kun pabayadan nin daños an environmentalist sa naging destroso sa publiko asin sa cooperativa nin electricidad maging si nakadamay na residencia.

An Casureco II nagpahayag na magiging maliwanag an saindang enterong coverage area antes kan Deciembre 25.

An Sangguniang Panlungsod sa pamamayo ni Bise Alcalde Nene de Asis nagpasar nin resolucion na minadeclara nin state of calamity kan ciudad nganing magamit an calamity fund ngonian na 2019 sa relief operations sa mga evacuees maging sa iba pang proyecto na naapektaran kan nakaaging calamidad.

Sa DPWH, saro man sa saindang binabasol kun na-aabala an proyecto sa road widening project sa ciudad maging sa iba pang mga banwaan iyo an mga ulang na estraktura lalo na an mga puon nin hahoy sagcod naka-abot an isyu sa jusgado kasunod kan sinangat na caso kan grupo nin environmentalists.

An resulta kan proyecto kan DPWH putol-putol an patrabajo kan tinampo huli ta dai maputol an mga kahoy sagcod na igwa pang temporary environmental protection (TEPO) an corte.

Apektado kan TEPO iyo an nakatalaan na kutang putolon kan DPWH na mga dakulang kahoy sa barangay San Felipe.

Nag-isyu na tree cutting permit an Department Environment and Natural Resources (DENR) Bicol alagad mayong magiginibo an obras publico.

Sa Casureco II, sinabi ni Rinner Bucay an opisyal na parataram kan cooperativa na nagkaperang centro kan ciudad na mayong destroso sa saindang mga linya an igwa nang suplay nin kuryente.

Alagad si may mahiwas na destroso aabuton pa antes kan pasko mapapabulosan nin kuryente. (DPA)