Mga BBB proj sa Bicol pinaluwas kan OPABA

An napendienteng pagpahiwas sa runway kan Naga Airport sa Pili, Camarines Sur kabali pa sa listahan kan Malacañan sa mga Build, Build, Build (BBB) program alagad na-uulang sana an implementasyon huli kan isyu sa land acquisition na apektado an nagkaperang mga paraoma.

Si Presidential Adviser for Bicol Affairs Marvel Clavecilla nagpahayag na yaon pa an fondo sa rehabilitasyon asin pagpahiwas kan runway kan aeropuerto sa Pili, Camarines Sur.

Kabali sa prioridad iyo an pagtapos kan P4.7 na Bicol International Airport sa Daraga, Albay na nagpapadagos pa an implementasyon asin dapat taposon kan duwang contractor sa 2022, antes matapos an termino ni Presidente Rodrigo Duterte.

Sa road widening project, segun pa ki Clavecilla an bilog na Kabikolan nagpapadagos pa an mga proyecto asin ipapadagos ini sundo sa pagtapos kan termino ni Duterte sa irarum kan BBB asin kaayon na iyo an pagpahiwas kan mga tulay sa national road.

An mga proyecto sa infrastraktura gabos pig-iimplementar kan Department of Public Works and Highways mantang an aeropuerto yaon sa jurisdiksyon kan Department of Transportation (DOTr).

Asin an piglalangkag na proyecto kan Philippine National Railways (PNR) South Long Haul na masikad an implementasyon sa ika-duwang cuarto kan 2020, alagad sinabi ni Clavecilla ngonian na Viernes, Deciembre 6 magkakaigwa sindang urulay sa Regional Development Council nganing resolberan kun igwa pang isyu antes kan pagpuon sa proyecto.

An fondo sa proyecto kan perrokaril nagcacantidad nin P175 bilyon na inutang kan gobierno kan Filipinas sa China na babayadan sa laog nin vienteng taon.

Kun marealisar an proyecto mapalipot kan viaje Manila – Bicol na halawig na an anom na oras sa dating diez oras. (DPA)