Fondo sa rehab sa ECs kaipuhan sa Bicol
Lineman kan Casureco II padagos an pagpakarhay kan mga linya asin poste sa barangay Pacol, Ciudad nin Naga sagcod sa ngonian mayo pang kuryente asin sa kataid na itaas na barangay. (DPAureus)
Sa paagi nin privilege speech liwat nagtindog sa sesyon kan Camara-Baja an congresista sa tercer distrito kan Camarines Sur nganing hagadon sa administrasyon ni Presidente Rodrigo Duterte an pagpaluwas kan P700 milyon na Electric Cooperative and Resilient Fund nganing matabangan sa rehabilitasyon an mga electric cooperatives (ECs) sa Bicol na pinalakma ni bagyong ‘Tisoy’.
Sa privilege speech ni Congresista Gabriel H. Bordado kan Deciembre 9, saiyang pinaabot sa congreso an kamugtakan sa mga destroso sa mga linya nin kuryente kan Camarines Sur II Electric Cooperative (Casureco II) Inc. maging iba pang cooperativa sa rehiyon Bikol na sagcod sa ngonian mayo pa nin suplay nin kuryente nin huli kan ginatos na mga poste nagkaturomba kan nakaaging calamidad.
An kadakli kan mga municipalidades na sakop kan tercer distrito orog na si may ginatos na mga electrical post na pinatumba ni Tisoy dai pa napapabulosan nin kuryente.
Si Administrator Edgardo Masongsong kan National Electrification Administration na nagbisita sa Camarines Sur matapos kan calamidad nagpahayag na maabot sa P400 milyon hasta P500 milyon an danos sa destroso ni Tisoy sa mga cooperativa nin electricidad sa rehiyon cinco.
An P700 milyon na fondo makakatabang sa mga cooperativa nganing maparikas an rehabilitasyon asin maibuelta an serbisyo nin kuryente, sabi pa ni Bordado.
An NEA haloy nang nagpaluwas nin direktiva sa mga cooperativa sa nasyon na magsumiter kan saindang resilient plan na saro ini sa babasehan sa pagpaluwas nin ayuda hali sa Electric Cooperative and Resilient Fund oras na magkaigwa nin calamidad.
An opisyal kan NEA naheling an mahiwas na destroso sa mga poste na saro sa causa iyo an mga puon nin kahoy na natumba kan bagyo sagcod nang dagos nakadamay an mga linya.
Alagad sa Ciudad nin Naga nasa 70 por ciento nang may ilaw an mga barangay base sa report ni OIC General Manager Emelita Candia kan Casureco II huli sa pagtabang kan City Hall digdi na maparikas an rehabilitasyon.
Sa Camarines Sur III Electric Cooperative (Casureco III) sa Rinconada area saro sa mga binisita ni Masongsong asin naheling niya an dakulang destroso sa mga poste asin mga linya.
Nagtabang na an ibang cooperativa nin electricidad hali sa rehiyon 1, 2 asin 3 nganing magpasiring sa Casureco III asin iba pang cooperativa. Maabot sa 140 mga lineman an pigwarak sa mga banwaan sa Camarines Sur asin an iba sa ibang provincia kan Bicol. (DPAureus)