Gobierno pabuelohon sa Rice Tarrification - NFA

TAWAN ta nin pagkakataon an ley asin halaton an magiging rekomendasyon kan mga economic manager kan administrasyon nganing mas ma-improve an Rice Tarrification Law.

Ini an kasimbagan kan National Food Authority sa Bicol sa pamamayo ni Regional Manager Henry Tristeza sa tahaw kan kahurotan kan sektor nin paraoma na ibasura na an Rice Tarrification law huli ta padagos sindang apektado kan pagbaba kan presyo kan paroy puon na mag-epekto an RTL.

Si Tristeza, nagatubang sa miembros kan prensa sa ginibong media briefing sa Ciudad nin Naga dai palang nahahaloy na padreno kan Departamento de Agricultura sa Bicol asin saiyang pigpaliwanag an kamugkatan nin suplay kan NFA rice sa rehiyon cinco.

Saiyang pigpaliwanag na katuyohan kan gobierno kan RTL dai pasakitan an paraoma alagad nagkaigwa nin problema an apektado iyo an ordinaryong paraoma.

An NFA asin DA, nagtatarabangan nganing maresolberan an isyu sagcod na maghaman nin rekomendasyon sa problema sa pagbagsak kan presyo kan paroy mantang an presyo kan commercial rice halangkaw man giraray.

Kan panahon na dai pa napipirmahan ni Presidente Rodrigo Duterte an propuesteong Rice Tarrification an NFA nag-ooponer huli ta apektado an ahencia asin dakul an mahahaling mga empleados asin hahalion sa sainda an poder sa pag-angkat nin bagas sagcod na limitado na an saindang poder.

Kasurog ninda an paraoma huli ta ciertong apektado an saindang produkto sagcod nangyari an pagbagsak kan presyo kan paroy envez an tinawan nin buelo iyo an mga higanteng rice traders.

Nangyari an negatibong epekto sa paraoma asin sa ahencia, alagad an pakiulay nalang ni Trizteza ‘tawan nin pagkakataon an ley.’

An ginigibo ngonian kan NFA iyo an pagbakal kan alang na paroy kan mga paraoma sa presyong P19 cada kilo mala ngani pano-pano na an saindang mga bodega nin binakal na paroy.

An direktiva ni Duterte sa NFA, bakalon an paroy kan paraoma envez na darahon ninda sa kumprada na barato an presyo kan paroy. Target kan ahencia na makabakal nin 1.8 milyon na cavan nin paroy sa 2020 mientras nagseguro nin fondo an NFA para sa palay procurement program sa rehiyon cinco.

Sa lado kan DA iyo an pagpa-utang nin P15 mil sa mga paraoma na babayadan sa laog nin walong taon na mayong interes asin pagtaong tabang sa paagi nin makinarya asin an pinakahuri iyo an dugang na itataong P5 mil (DPA)