Mga paraoma na apektado ni “Tisoy” may libreng banhi

Mawaras nin libreng banhi an Department of Agriculture sa Bicol sa mga paraoma na apektado kan paglamasa ni bagyong ‘Tisoy’ nganing makatanum tolos alagad, ini afuera kan na enot na certified seeds na maabot sa 800 na recipientes sa Daraga, Albay sa lindong kan DA Philrice sa programa sa Seed Component kan P10 bilyon na Rice Competitiveness Enhancement Fund (RCEF).

Si Emily Bordado, opisyal na parataram kan DA Bicol nagpahayag an saindang ahencia naghihiro na nganing maayudahan an ribo-ribong paraoma sa rehiyon cinco na nadestroso kan nakaaging calamidad nganing maka-recover tolos.

Igwa nang enot na pigdidistrubuer an ahencia alagad huli ta dakula si daños sa paraoma ni bagyong Tisoy na dakul na kaomahan an nalantopan nin tubig baha kaipuhan an suporta kan gobierno.

Sa partial damage report sa agricultura sa anom na provincia kan Kabikolan na apektado kan calamidad nagsakat na sa P2 bilyon asin ini piglalaoman na malangkaw pa mientras na nag-aarabotan pa an dugang na damage report hali sa mga banwaan kan Camarines Sur na iyo an tambubong nin paroy sa Bicol asin hali pa sa ibang provincia.

Maabot sa cuarenta por ciento kan daños hali sa mahiwas na kaomahan na inabot nin tubig baha si paroy. Piglalaoman na bako lang certified seeds envez igwa pang dugang na libreng abono.

Katuyohan kan DA sa programa sa RCEF nganing mabawasan an production cost sa pagoma bilang interbensyon sa pagbagsak kan presyo kan paroy epekto kan Rice Tarrification Law.

Sa total na fondo kan RCEP an P5 bilyon gagamiton man para sa makinarya kan paraoma na makakabawas pa kan saindang dakulang gastos sa pagtanum nin paroy.

Kan nakaaging bulan pinangenotan ni OIC Regional Executive Director Rodel Tornilla asin ni Gobernador Al Francis Bichara kan Albay an distribusyon kan banhi sa mga paraoma sa Camalig, Albay. (dpa)