Pasalamat ki Tisoy. Pasalamat ki Digong



Rinadas kan bagyong Tisoy an enterong Kabikolan, gabos pati itinaas an sinyal numero 3 sa anom na provincias asin pitong ciudades. An tood ngani kan PAGASA asin ni Mike Padua haling Catanduanes an makusog na duros ni Tisoy matugpa sa Partido area kan Camarines Sur, dangan mahapit sa Naga antes magderetsong sulnupan kan Luzon asin West Philippine Sea paluwas na sa nasyon. Kundi nagsibyada an mata kan bagyo pasiring Legaspi sagkod Sorsogon.

Segun sa bareta sarong milyon ka-tawo an nagulpi kan bagyo digdi sana sa Kabikolan. Nagrabe man an Samar na inabot nin hararom na baha asin nagkagarabaan nin dakol na harong. An Quezon province nanganaan man an mga pananom lalo na an niyog, paroy, asin gulayon. Arog kan linalauman dakol na parte kan Kamaynilaan an binaha.

Digdi sa Bikol sagkod sa oras na pigsusurat ini dakol pang lugar an mayong kuryente, maski sa mga ciudades kan Naga, Iriga, asin Legaspi.

Mamundo an kadaklan sa sinapo kan milyones de pesos na kantidad nin produkto agricultural na nagkararaot o nagkaralapa huli sa duros, uran asin baha. May mga harong na nagkadaranyaran, nagkagaraba o naghiray. Grabeng kahaditan an dinara kan nagdadangadang na kalamidad batay sa mga bareta sa radyo asin telebesyon na may nagdadangadang na supertyphoon tunggo sa enterong Kabikolan. Pungot an kadaklan sa nagguin resultadong blackout huli sa pagkawara nin kuryente bunga kan pagkapurotol nin alambre asin poste nin elektricidad.

Suspendido an klase poon elementarya sagkod kolehiyo sa manlaen-laen na parte kan Kabikolan.

Grabe an perwisyong dinara ni Tisoy.

Bako lang pungot o kamunduan kundi grabeng anggot an namamatean kan mga Bikolano espesyalmente an mga naguin biktima kan kalamidad.

Sa ibong na lado igwa man nin mga naogma kan pagbisita ni Tisoy sa Kabikolan. Gulping lugar an naideklara sa irarom nin state of calamity. Imbes na mamundo orogma lugod an mga opisyales kan gobyerno lokal. Nagkaigwa sinda nin oportunidad na magbakal nin pahingurag na relief goods poon sa mga instant noodles, sardinas, asin iba pang delata asin sinakong mga bagas.

An mga opisyales kan mga barangay, banwaan, ciudades, asin mga provincial nagkaigwa nin rason maglibot sa mga barangay, nagdistibuir nin mga relief goods asin magplatika, magbuladas sa saindang mga constituentes.

Sarong halangkaw na opisyal kan gobyerno an nag-anunsyar na maabot siya alas 3 nin hapon pero nag-abot alas 6 nin banggi. Dai pa nagpoon tulos an destribusyon kan mga epektos sa dakul-dakol na mga tao ta nagplatika muna kan saiya daang mga nahaman nakadakul-dakol na proyektos.

Dai aram kan tao na magpoon sa relief goods na bagas, delata, asin noodles sagkod sa mga proyektong tulay, tinampo, eskwelahan, covered court, asin iba pa hali man sana sa bulsa kan mga tao o sa kaban kan banwaan bako man lamang hali sa mga politiko.

Kulibat ko palan maski si Presidente Rodrigo Roa Duterte nagdalaw sa Legaspi tanganing magbisita sa mga nadestroso kan kalamidad. Pero an Naga na ciudad ni VP Leni Robredo dai niya inabot. An Legaspi kaya iyo na an regional center kan Bikol bako na an Naga poon pa kan 1976 kan kapanahonan ni Presidente Ferdinand Edralin Marcos.


* * *

Kan naglalakaw-lakaw ako sa Naga City Public Market may nagtikwil sakuya asin nagsabi na omawa man daw si Presidente Duterte ta listing nagbisita sa Bikol pakalihis kan bagyo.

Garo baga si VP Leni Robredo asin Presidential Spokesman Atty. Sal Panelo iyo an pigtutukar mo sa saimong column sa Bicolmail huling si VP Leni taga Naga asin sarong Bikolana piglilingaw-lingawan mo si Presidente Digong na gulpiman naginibohan para sa Bikol.

Enot an pagpuho kan droga sa Naga asin sa satong provincia, ikaduwa an pagnumbra sa saiyang kompadre, kaklase asin brother sa fraternity na si Judge Marvel Clavicilla bilang Undersecretary para sa Kabikolan.

Pinabukasan tulos ki Senador Bong Go an Malasakit Center sa Bicol Medical Center. An pagbugtak ki Dante Jimenez bilang chairman kan Presidential-Anti-Crime Comission.

An pagtiwala niya ki Senador Tol Tolentino como sarong Bikolanong taga Albay, como political adviser. An pagbugtak niya ki Atty. Fred Lim kan Tigaon bilang Presidente kan PAGCOR asin an pagtulerar niya sa mga Bikolano na maguin pusog na opposisyon sa saiyang administrasyon tanganing ipaheling sa nasyon asin sa enterong kinaban na pusog an demokrasya asin Rule of Law sa Pilipinas.

Iyan si Digong sa mata kan mga Bikolano.

* * *

Mag-antabay sa programang “INI AN TOTOO” kada Sabadong alas 8:30-9:30 nin aga (oras sa Pilipinas) sa OK Bangon FM, 97.5 KHZ/PBN TV 5, Caceres cable,Sky cable asin facebook live streaming worldwide. Program hosts: Winnie Ceas-Ventura and Ernie Verdadero.

May mga espesyal na bisita.

Diyos mabalos.

For comments/ reactions, please contact Cp nos. 09296281848/09613638409 or verdaderoernesto@yahoo.com/fb: Ernie Verdadero

Website: www.bicolmail.net