CSur dai apektado sa produksyon nin niyog matapos kan calamidad
Dawa inagihan nin bagyong Tisoy an Camarines Sur kan Deciembre 2 alagad dai apektado sa coconut production an provincia maging sa copra nin huli ta ‘’negligible’’ an daños sa plantasyon.
Si John Villareal, jefe kan Philippine Coconut Authority (PCA) sa Camarines Sur l na nagsasakop kan mga municipalidad kan premir, segundo asin tercer distrito nagpahayag kaini sa Bicol Mail matapos an provinciang ini inagihan nin calamidad asin saro sa may halangkaw nin produksyon sa niyogan.
Naglalangkaw an populasyon sa mga plantasyon dawa igwang nagpuputol asin nadestroso kan bagyo kasunod kan programa kan ahencia sa mga paraoma na madugangan an saindang mga tinatanum na niyog.
Sa damaged report kan nakaaging calamidad, ipinahayag na nag-aabot sana sa 21 mil na puon nin niyog an totally damaged, sa slightly damaged – 2.8 milyon na puon nin niyog asin ini cinco por ciento kan coconut plantation asin ini puedeng makabangon puon anom na bulan sundo sa sarong taon asin sa moderately damaged – 2.2 milyon na puon nin niyog.
Saro sa may dakul na destroso iyo an Minalabac asin Pasacao.
Sinabi pa ni Villareal, base sa saindang reconesidong datus kan taon 2012 igwang 7.2 milyon na puon nin niyog alagad ngonian nag-aabot na sa 9.8 milyon na puon nin niyog.
Pagdakul an puon nin niyog halangkaw man an produksyon mala ngani nag-aabot na ini sa 300 milyon.
Sa isyu sa hababang presyo nin copras, sinabi pa na an Department of Agriculture asin PCA nagtatabangan nganing daing gayo apektado an paraoma nagkakaigwa sinda nin marikas na estratihiya siring kan mga minasunod: Magkaigwa nin direktiba na maggamit nin buko sa sa mga pagtitiripon para makabenta an mga paratanum nin niyog dawa dai pa nagkokopras asin An inaapod na cooperative Direct Coconut Marketing na direktang pagpabakal sa mga ‘’oil mills/desiccator plants’’.
An DA puedeng magpa-utang nin kapital asin pambakal nin trak asin magkaigwa sinda nin coordinasyon sa mga oil millers na sinda an diretso nang magbakal sa mga cooperativa o organiasyon kan mga magniniyog. (dpa)