SA 18th CONGRESS: 1k bed capacity sa BMC aprobado na

World class na mga edificio kan Bicol Medical Center mahiwas pa an espacio sa laog gigibohon nang 1,000 bed capacity asin dugang na mga hospital equipment.

Mareresolberan na an kakulangan nin bed capacity kan Bicol Medical Center (BMC) sa Ciudad nin Naga matapos makalusot na sa 3rd and final reading kan 18th Congress an house bill 883 na gibohon nang 1,000 hali sa dating 500 na bed capacity.

An bill na orihinal piglantiar ni Congresista Gabriel H. Bordado Jr. kan tercer distrito kan Camarines Sur kan 17th Congress sagcod na-aprobaran sa 3rd and final reading asin pigsunad tolos sa senado alagad na-igilid huli ta masara na an huring sesyon kan nakaaging 17th Congress.

Saiya liwat binuhay ngonian na 18th Congress asin naaprobaran sa Committee on Health ni Congresista Angelita Tan na nagbali na bilang co-author sa bill ni Bordado. Maabot sa veinteng mga lihislador an nagbali asin co-author sa house bill kan representante sa tercer distrito kan CamSur.

Piglinaw kan lehislador kan tercer distrito sa CamSur na bako lang sa bed capacity an na-aprobaran envez para sa upgrading kan mga service facilities, dugang na medical equipment, dugang na doctor, nurses asin iba pang empleados.

Napag-araman na si Congresista LRay Villafuerte kan segundo distrito kan Camarines Sur igwa pang huring pigplantiar na haros kaparejong bersyon kan house bill sagcod na pigsararo na kan Committee on Health nganing aprobaran kan Martes na hapon.

Naghihinayang si Bordado kan darakula asin bagong edificio kan BMC alagad suroksokan an mga pasyente kaya ngani saiyang tinutokan nganing maaprobaran an bill mantang an mga pasyente kan hospital bako lang hali sa Camarines Sur envez sa iba pang provincia kan Bicol.

Magiging katuwang ni Bordado sa bill sa senado iyo sinda Riza Hontiveros, Kiko Pangilinan asin Bong Go.

An dugang na bed capacity, dugang na mga doctor, nurses asin empleados dugang man na fondo kan hospital, sabi pa.

Antes naaprobaran an bill nagkapera nang veces nakaulay ni Bordado si Director Dr. Francisco Sales asin iba pang opisyal kan BMC.

Pigpaliwanag kan jefe kan hospital an kamugtakan kan suroksokan na pasyente na kaipuhan na an dugang na bed capacity.

Sa record kan hospital inaabot nin 800 hasta 900 an pasyente na naglalaog aroaldaw.

An pagdugang na capacidad kan hospital dai puedeng sadiring desisyon kan manijamiento envez dapat mag-agi man giraray sa congressional act nganing matagamahan nin dugang na fondo. (DPAureus)