NPA nagsinutil sa untok putok

Pili, Camarines Sur – An 9th Infantry Division kan Philippine Army sa Bicol na may base sa Camp Elias Angeles, brgy. San Jose sa banwaan na ini disganado sa CPP/NPA/NDF sa pagsinutil asin daing respeto sa pigdeclarang holiday ceasefire kan Lunes, Deciembre 23.

Kinukundenar kan 9th ID sa pamamayo ni Major General Fernando Trinidad an pang-aatake kan nagkaperang armadong rebeldeng NPA sa mga soldados kan 92nd Division kan hipaan sa paagi nin improvised explosive devices (IED) sa barangay Baay, Labo, Camarines Norte, sabi ni Major Ricky Aguilar opisyal na parataram kan militar sa Bicol.

Saro an gadan na si Cpl Noel Darya asin anom an mga iredo mantang pabuelta na sa saindang kampo sa brgy. Baay asin saindang iginilid an ano man na operasyon laban sa mga rebeldeng NPA matapos magdeclarang unilateral ceasefire si Presidente Duterte alagad binakbakan an biktimang mga soldados.

An incidente nangyari alas 9:00 nin aga kan Deciembre 23 perang oras matapos magsikad an untok putok na matatapos sa Enero 7, 2020.

Namumundo an 9th ID apesar kan parejong nagdeclara nin untok putok kan gobierno asin CPP/NPA/NDF alagad hinipaan an saindang mga soldados.

Sinabi ni Aguilar an padagos na pagsinutil kan rebeldeng grupo sarong indikasyon na dai na ninda pigsusunod an saindang founder na si Jose Maria Sison kan CPP.

Si Duterte nagdeclara nin holiday ceasefire sa kumunistang grupo bilang pag-andam sa pagbuhay liwat kan urolay pang katuninongan sagcod na nag-orden na mag-miting na an government panel.

Antes magdeclara nin ceasefire si Duterte an defense department, an interior department, an establisimiento militar asin an Philippine National Police an dai na uyon sa untok putok nin huli ta an mga rebelde dati nang ginagamit an suspension of military operations huli ta natatawan nin buelo sa pagpakusog kan saindang fuersa asin nalansar nin pang-aatake.

Magigirumduman kan taon 2017, an Presidente ibinasura an urolay pang katuninongan sa mga lider kan kumunista matapos mangyari an mga sunod-sunod na pang-aatake kan NPA sa tropa kan gobierno.

Alagad nagbagong panindugan kan nakaaging bulan, nagtutubod na dapat buhayon giraray an peace negotiations huli ta iyo na ini an ‘’last card’’ nganing taposon na an cincuentang taon nang kumplikto sa mga rebelde.

An AFP asin PNP dawa contra na sa ceasefire nagpahayag na saindang susunodon an orden ni Presidente Duterte. (DPAureus)