SA MNWD Delihencia nagbababa, mapalangkaw tarifa

An Metropolitan Naga Water District (MNWD) nagkumfirmar na kinakaipuhan nang magdagdag an sindang singil sa tarifa sa tubig matapos enot nang nag-implementar kan dugang na tarifa kan 2009, onceng taon nang nakakaagi.

Alagad si General Manager Virgilio Launsing naglinaw an saindang intensyon bako sa ipapaconstruhir na P127.7 milyon Surface Water Treatment Plant sa Bicol River nurong taon envez sa mga masunod na proyecto kan water district.

Sa entrevista kan Bicol Mail sa general manager, sinabi kaini an dugang na tarifa cantidad P160 hasta P180 sa cada minimum na sampulong metro cubico na consumo nin tubig alagad maagi pa ini sa pag-evaluar kan Local Water Utilities Administration (LWUA).

Dinagdag pa napapanahon an dugang na tarifa asin an saiyang asegurasyon bakong dakula an cantidad kumpara sa average sa Camarines Sur maging sa Bicol na nagaabot sa P220 hasta P250.

An LWUA iyo an madeterminar kan cantidad na dugang na tarifa na iyo man an isusumiter sa mga public consultation sa consumedores sa sakop na mga banwaan kan manijamiento kan water district.

An planong ining nganing segurado na masusteniran an operasyon kan MNWD.

Pigheheling kan MNWD an saindang financial stability nagdidikit na sana an delihencia asin dapat pag-andaman an ano man na calamidad kun tamaan an saindang transmission line kinakaipuhan perming preparado sa ano man na rehabilitasyon asin proyecto.

Taon-taon naglalangkaw nin 2,600 hasta 3,000 an saindang consumedores asin kaipuhan preparado an opisina, sabi pa ni Launsing. (DPAureus)