Fake news kan militar pigdenunciar

Pigdenunciar kan Defend Bicol asin Tindog Pumuluyong Masbateño an pinaluwas na retrato sa media kan 9th Infantry Division kan Philippine Army kan Deciembre 26, 2019 na maabot sa 306 na NPA surrenderees sa Masbate alagad saro palang na fake news asin pinapa-inbestigaran na ni Defense Secretary Delfin Lorenzana. Sa ginibong Fact Finding Mission (FFM) kan Karapatan-Bicol asin Tindog Pamuluyong Masbateño kan Deciembre 21-22, 2019 sa isla kan Masbate, maabot sa 300 na mga paraoma na nagtitiripon sa Masbate Provincial Training Center mientras na nag-aandam sa pagparticipar sa komemorasyon kan International Human Rights Day kan Deciembre 10 alagad binagat sinda kan mga militar alas 9:30 nin aga asin pinalibre sana sa kamot kan mga soldados alas 3:00 nin hapon. Nabigla an grupo kan mga paraoma asin an iba nakadalagan padulag alagad nawalat an 147 paraoma. Sapiritan sindang pinapirma sa blankong papel, nilikturahan, pinataas an mga kamot mientras na pigkukunan nin retrato asin bidyo sagcod na dagos na sindang pigdeclarang mga nagsukong rebeldeng NPA. Afuera pa kaini, sa ibang barangay, sa banwaan nin Cawayan, Masbate, tiniripon kan mga militar sa barangay hall an mga residente, nililikturahan kan mapadapit sa Enhanced-Comprehensive Local Integration Program (E-CLIP), sapiritan pinapirma sa blankong papel asin pinataas an saindang mga kamot. Kinuanan nin retrato asin bidyo asin pigdeclarang mga rebel surrenderee, asin pinatanidan na dai mag-participar sa mga protest rally. Si Major Gen. Fernando Trinidad, Commanding General kan 9th ID na namay base sa Camp Elias Angeles, San Jose Pili, Camarines Sur dai paman napaluwas kan saiyang comento asin magiging aksyon sa envueltong opisyal kan saiyang comandancia.

DEFENSE SECRETARY NAKIARAM NA SA CONTROVERCIA

Si Sekretaryo Delfin Lorenzana nagpaluwas na nin direktiba ki Army Chief Lt. Gen. Gilbert Gapay na magconducir nin inbestigasyon sa pinaluwas na fake images kan pigsasabing 306 na NPA surrenderees sa Masbate na isinabay sa ika-51 anibersaryo sa pagkakatugdas kan CPP kan Deciembre 26.

An cuestionableng retrato viral online asin nakaka-apektar sa programa kan gobierno contra sa insurgencia. Sinabi pa na si Lt. Col. Ramon Zagala, opisyal na parataram kan Militar an nagpaluwas kan retrato iyo an 9th ID Public Affairs Units Office asin nagtao na nin paliwanag kan saindang lado sa isyu sa pigmaniobrang retrato na nagluwas man sa mga online news outlets.

Inako ninda huli ta mawot ipaluwas nin amay an inpormasyon sa publiko alagad dai ninda nareparo o na-double check an mga retrato, sabi pa kan opisyal kan militar.

An photoshopped pinapaheling an grupo kan pigsasabing rebeldeng NPA asin suportadores nakatindog sa atubangan kan halabang lamesa an manlaen-laen na kalibreng armas na isinuko kan mga rebelde sa militar. Sa National Democratic Front (NDF) Bicol, sinabi kan saindang opisyal na parataram na si Ma. Roja Banua na sa desperado na an gawi-gawi ngonian kan militar pinapaagi na sa fake news an mga inpormasyon sa publiko asin pigdudoktoran pa an retrato na pinapaluwas sa media.