SA ’NAGA NA’ PUON NGONIAN NA 2020: Towing ordinance vs pasaway na tsuper
Magiging estricto na ngonian na taon 2020 an Public Safety Office (PSO) asin Naga City Police Office (NCPO) sa mga pasaway na tsuper nganing iimplementar na Towing and Expanded Wheel Clamp Ordinance o City Ordinance No. 2018-18 na masikad sa Lunes, Enero 6.
Si Renne Gumba, jefe kan Public Safety Office nagpahayag na magkakaigwa muna sinda nin miting ngonian sa mga envueltong opisyal kan awtoridad na iyo an mangengenotan sa implementasyon kan ordinansa.
Si Consejal Joselito del Rosario, pamayo kan Committee on Transport sa Sangguniang Panlungsod nagpahayag sa Bicol Mail na tapos na an gabos na proceso sa consejo sagcod naka-accredit na nin towing company.
An ordinansa na-aprobaran sa sanggunian na padreno si del Rosario kan panahon ni dating Alcalde John Bongat alagad dai naimplementar tolos nin huli kan kawaran pa nin towing company alagad ngonian mayo nang kaulangan mantang voluntad nang nag-opresir an Maxicam Body and Bumper, sarong towing firm nganing iimplementar na an ordinansa ngonian na taon.
Si Maximo Camacho, general manager kan towing company nagpahayag na andam na an saiyang tres mil metros cuadarong lote sa Barangay Bagumbayan Sur bilang impounding area.
An ordinansa iimplementar kan PSO nganing i-tow asin guyodon an mga tinuwadan asin ilegal nakagarajeng vehiculo sa mga No Parking area asin maimponer nin penalidad sa mga nasinutil sa ordinansa.
Sinabi pa ni del Rosario na base sa saindang ordinansa an towing company igwang kaibanan na PSO/PNP sa pagbutong kan vehiculos alagad kaipuhan magbusina muna nin tolong veces bilang warning sa tsuper.
Kabali sa towing zone iyo an kalabaan sa toong porsyon kan tinampo hali sa Brgy. Tabuco pasiring sa Metropolitan Cathedral, mga fire lane, mga designadong lugar sa Panganiban Drive, Elias Angeles, Panganiban, Caceres Street, sa toong porsyon kan Hernandez Ave. haling UNC sundo sa Naga City People’s Mall asin nagkapera pang lugar na pigdesignar kan PSO base sa ordinansa kan ciudad.
An PSO nagbugtakan na nin mga signages sa mga designadong wheel clamp asin tow way zones mientras na katuwan ninda an City Events, Protocol and Public Information Office (CEPPIO) sa pagpaluwas nin mga inpormasyon sa publiko sa iimplementar na ordinansa.
Igwa na sindang mga ginigibong massive information sa mga tsuper sa pagpasunod kan pinaka-primirong towing ordinance sa Bicol na iimplementar sa Naga.
Si Alcalde Nelson Legacion nagpahayag na kinakaipuhan nang iimplementar an ordinansa sa tahaw kan problema sa trafico nganing madisciplina an mga pasaway na motorista na dawa saen na sana naggagaraje kan saindang vehiculos apesar na yaon na sa bawal na lugar.
An towing company iyo na an ma-tow kan mga ilegal nakaparada asin an madadakop na vehiculos mamulta puon sa P1,000 hasta P1,500 alagad depende sa klase kan vehiculos asin dugang na multa sa cada kilometraje sa distancia kun saen nadakop na lugar abot sa impounding area.
An mga masinutil tinatawan nin tolong aldaw nganing balukaton asin dugang na P100 cada aldaw bilang penalidad pakatapos kan pigtaong plaso.
Kun sa laog nin duwang bulan dai balukaton an vehiculo kan kagsadiri mapipiritan an ciudad na ipabakal sa paagi nin subasta sa publiko. (DPAureus)