Visa sa manga Americano makakaapektar sa turismo

An Arts, Culture, and Tourism Office (ACTO) kan lokal na gobierno sa Ciudad nin Naga nagtutubod na dakulang epekto sa industriya nin turismo digdi maging sa iba pang lugar sa Bicol kun estricto nang iimplementar an visa requirements sa mga Americano na mapasiyar sa ciudad.


Sa entrevista kan Bicol Mail ki Alec Francis A. Santos, jefe kan ACTO nagsabi na treinta (30) por ciento kan mga turista na naglalaog sa Ciudad nin Naga hali sa Estados Unidos.

Puon mga bulan nin Septiembre, Oktubre, Noviembre, Deciembre, Enero hasta Febrero nag-aarabotan an mga turistang Americano sa ciudad asin nabalyo pa sa magagayon na lugar sa Camarines Sur, nabisita sa bantugan na Volcan Mayon asin iba pang mga tourist spot sa Bicol.

Kun sa treinta por ciento inaabot nin 70,000 hasta 100,000 na Americano an nagdadayo sa Ciudad nin Naga.

An mga turistang Koreano iyo an nangengenotan sa mga dayuhan, nagsusunod an Americano asin Austrialano, sabi pa ni Santos. An industriya nin turismo nakakatabang sa ngaran na economia sa ciudad asin pagtaraid na banwaan.

Saiya pang sinabi na dai makakatabang sa industriya nin turismo sa satong lugar an patanid na ini kan Malacanan na estrictohan sa visa requirements an mga Americano.

An ibang opisyal kan Department of Tourism (DOT) nagsabi kun iimplementar an kasugoan kan Malacañan ngonian na taon an mas tatawan nin prioridad kan mga Americano iyo na magbakasyon sa mga lugar na visa free siring kan Singapore.

An pag-estricto na kan malaog na mga Americano sa Pinas bilang reaksyon kan Malacañan matapos mangapudan si U.S. Senator Dick Durbin sa administrasyon Duterte na palibrehon an nalalaom sa carcel na Bicolanang Senador Leila de Lima envez na patanidan an mga kaalyado kaini sa paagi kan pag-estricto sa paglaog kan mga Kano sa nasyon.

Si Senador Durbin kaayon sa duwang senador kan Estados Unidos na pigbabawalan na maglaog sa Filipinas matapos saindang pangenotan an Senate Bill asin naaprobaran na dai tinutugotan an mga opisyal kan gobierno sa Filipinas na makaviaje sa US na nasa likod kan pagkaso asin pagpakulong ki de Lima.

An bill saro nang ley asin aprobado na sa 2020 national budget kan U.S. na pirmado na ni Presidente Donald Triump.

Sa pinakahuring paliwanag kan Malacañan, sinabi ni Spokesperson Salvador Panelo na dai apektado an mga Filipino-American sa iimplementar na visa requirement ni Duterte sa mga Americano. (DPAureus)