Nagsisinutil sa towing ordinance pig-uusip sa paagi nin telepono

Towing Team pinangenotan ni PSO Chief Renne Gumba (ika-anom hali sa too) kataid sa wala si Maximo Camacho, General Manager kan towing company asin si Boboy Salva kan PSO.

Aroaldaw igwang nahahatak an towing company nin mga vehiculo na nagsisinutil sa towing ordinance kan City Hall matapos punan iimplementar kan Lunes, Enero 6.

Concerned citizens na an nagpapaabot nin sombong sa Public Safety Office (PSO) kun igwang naheheling na vehiculo na nakagaraje sa tow away zone na naresponde man tolos an towing company.

Si Maximo Camacho, general manager kan towing company nagpahayag sa Bicol Mail na ini an nangyayari matapos saindang punan an implementasyon kan Enero 6 kan saindang hatakon an sarong SUV sa Caceres Street sagcod na saindang dinara sa impounding area sa barangay Bagumbayan Sur.

Kan Martes, Enero 7 pigrereclamo an sarong SUV harani sa Villa Caceres Hotel sa Magsaysay Avenue na nakagaraje sa pinagbabawal na lugar na tolos man pig-apod sa sainda asin ika-duwang sombong hali sa Bureau of Fire Protection na igwang ilegal na nakagaraje sa laog kan fire lane pasiring sa Bicol Medical Center.

An fire lane hali sa opisina kan BFP pasiring sa BMC sagcod sa kanto kan Panganiban Drive tolong taon nang tugak an implementasyon kan ordinansa alagad piglalaoman na madidiciplina an mga tsuper matapos igwa nang mahatak na SUV.

Sinabi pa ni Camacho na tolos man binabalukat kan kagsadiri an duwang SUV asin dai man agrabiado mantang aram nindang pagbalga sa ordinansa.

Sa enot na implementasyon kan Enero 6 naging presente mismo si Alcalde Nelson Legacion, PSO, representante kan LTO Naga asin Naga City Police Office.

Si Consejal Joselito Del Rosario, padreno kan ordinansa na na-aprobaran kan panahon ni Alcalde John Bongat nagsabi an multa sa mahahatak na vehiculo nagcacantidad nin P1,000 hasta sa P1,500 asin dugang na sangatos pesos na multa cada kilometro pasiring sa impounding area. (dpa)