OIC kan Casureco II pig-endorso sa NEA bilang permanenteng GM

Pinapusog sa Sangguniang Panlungsod kan Ciudad nin Naga an sarong resolucion na pig-eendorso ki OIC General Manager Emelita E. Candia sa National Electrification Administration (NEA) na nombrahan bilang permanteng general manager kan Camarines Sur II Electric Cooperative (Casureco) Inc.

Si Consejal Joselito del Rosario iyo an padreno kan resolucion nagsabi na bako lang nin huli ta califficado siya sa posisyon alagad pinaheling kaini an marhay na performance sa pagpadalagan kan pinakadakulang cooperativa sa Bicol.



Sa sesyon regular kan SP kan Martes, Enero 14 nganing mas mapusog an resolucion nagkasararo na maging joint and collection motion asin nakatalaan nang isumiter sa opisina ni Alcalde Nelson Legacion nganing pirmahan.

Kabali sa pigtawan nin duon sa resolucion na naka-address ki NEA Administration Edgardo Masongsong, an nagtutuyaw na OIC GM napadalagan niya an Casureco II na napaangat an categorization na ngonian saro nang Triple A.

An cooperativa pigdeclara kan NEA kan 2017 bilang Triple A asin mamantenir ni Candia kan siya magtukaw bilang OIC GM kan taon 2018. An onra saiyang narecibe kan Agosto 8, 2019.

Gustong sabihan nakaangat an saiyang finansyal nganing mapakarhay an serbisyo kan manijamiento nganing maka-implementar nin proyecto para sa miembros-consumedores.

Afuera kaini kan Marso 2019 an junta directiva kan Casureco II nagpasar nin resolucion na saindang pig-eedorso an OIC GM na maging permanente na sa posisyon.

Enot nang nagpasar nin resolution of commendation an SP na pigpadrenohan ni del Rosario nin huli kan marikas na restoration kan serbisyo kan kuryente matapos kan nakaaging bagyong Tisoy.

Sa entrevista kan BM ki Consejal del Rosario, sinabi kaini na panahon nang maging permanteng GM si Candia huli kan saiyang kabatiran sa serbisyo asin pagpadalagan kan cooperativa nin electricidad. Siya nagpuon magtrabajo sa cooperativa nin electricidad hali sa rank and file. (DPAureus)