Tano Ta Giyera?
Kan amay na parte kan dekada 30 kan naka-aguing siglo antes magbutwa si Adolf Hitler, antes magbuag an giyera mundial numero 2, duwang pinaka-madudunong na tao sa ibabaw kan kinaban---Sigmund Freud (psychiatrist/psychologist) asin si Albert Einstein (psysicist) nagsururatan sa lambang saro na naghahapot: “Why war? (Tano ta giyera?)
An duwa nagconforme na an giyera parte kan kultura kan tao asin kinaban, pirming imbuelto an violencia asin pagbulos nin dugo,na an sulusyon sa giyera giyera man giraray. Boot sabihon ang mapa-untok sa giyera, giyera man sana.
Bakong garantiya na an dakula asin poderosong nasyon iyo an magana sa giyera kontra sa saradit ta an saradit alagad sararong nasyones pwedeng patumbahon an higante kan saradit asin sararong langatong.
Arog kaiyan si nangyari kan si Allied Forces kontra sa Axis Powers kan World War 2.
Digdi sa Pilipinas si mga Hapones na may kasurog pang mga Koreano sa tabang kan mga Amerikano napasuko kan mga guerilyang Pilipino.
Mas grabe si Vietnam War na pinasakitan sagkod na magsuko an mga armadong Amerikano kan mga disiplinadong Vietnamese/Vitcongs kan dekada 50 sagkod 70.
Durante kan Philippine-American War pinasakitan an mga Kano kan mga Pinoy enot pa kan pag-alsa kan mga Pilipino kontra sa mga Kastila haman nang daog kuta an mga Espanyol kun dai nagpasurog sa kapwa puti asin nagmuro-muro sa suboot Battle of Manila Bay.
Sa mga nangyayari ngonyan sa Middle East na-irinitan kan mga Amerikano versus Iranians/ Iraqis, dai pa ngani napoon an giyera, (iparayo man lugod nin Mahal na Diyos), dakul na an nagkagaradan na bako man imbuelto sa ralaban arog kan mga taga Ukraine asin mga Canadians. Biktima kan pagbagsak kan eroplano na suboot tinamaan nin boque de giyera hali sa kampo kan Iran na nagbalos sa enot na pagsakyada kan mga Kano.
May nainot nang may nagadan na Heneral na Iranian, halangkaw na opisyal kan Iraqui Army asin iba pa na pwedeng punan nin dakulang giyera.
Alagad sa puntong ini an Amerika sa pangengenot ni Presidente Donald Trump habo makipag-giyera. Magamit na lang daa nin economic sanctions, iipiton na lang ang economiya kan Iran saka Iraq.
Ngonyan pa lang apektado an Pilipinas bako lang ang OFWs sa parteng idto kan kinaban kundi pati supply asin presyo kan krudo asin petrolyo na kaipuhan na marhay sa pagbuhay kan mga Pilipino.
Mayo na an USSR, an natatada na lang ang US na solamenteng super power sa kinaban aka Policeman of the World.
Sa totoo lang ang centro kan iriwal iyo an produktong petrolyo na nakatago sa irarom kan kadagaan kan Iran asin iba pang parte kan Middle East. Pero an sahot kan mga Amerikano iyo an terorismo kan Iran asin Iraq sa mga facilidades militar duman asin ibang parte kan mundo.
An Iran sadit sana pero tumang sa Amerika. Garo North Korea na tumang man sa Policeman.
Kun digdi sa Pilipinas kun magpasaway an police anggot ang publiko orog na ang opposisyon na mga kalaban kan gobyerno.
Sa entabladong pang-kinabanon ang papel kan Policeman of the World dai kayang questionon kan kadaklan na nasyones pati kan United Nations.
Masakit talaga pag may pulis. Masakit talaga an anuman na bagay na paaguihon pa sa pulis ta nararaot an kamada.
Marhay ngani ta may elementos pang diplomatico na nag-guiguibo kan gabos na bagay tangarig maareglar an mga gusot na ini.
Mientras tanto kitang mga Pinoy halat-halat lang asin mag-parangadie kita na mayo man lugod katibaadan. Mag-ibitar kita sa posibilidad na magka-igwa nin giyera civil sa Pilipinas na iyo ang gustong mangyari kan ibang rebelde asin elementos kan opposisyon.