20k dugang na votantes sa Naga

PAGPALISTA SA COMELEC. Dinagsa nin amay an primirong aldaw na voters registration sa Ciudad nin Naga. (dpa)

An Commission on Election (Comelec) sa Ciudad nin Naga pighihimunta an dugang na veinte mil (20,000) na bagong rehistradong votantes sa Ciudad nin Naga para sa eleksyon lokal asin nasyonal sa 2022.

Nagpuon kan Enero 20 ngonian na taon matapos sa Septiembre 10, 2021 an continuing registration mantang halawig an pigtaong panahon target kan Comelec kan ciudad an halangkaw na numero na dugang na rehistradong votantes.

Si Abogado Maico Julia Jr. Election Officer nagpahayag sa Bicol Mail na sa premirong semana kan pagpalista halaba tolos an nagpipirila alagad posibleng magkulpa ini sa masunod na semana.

Hagad ninda sa mga mapalista na dai na maghalat kan ‘last two minutes’ nganing dai magsuroksukan sa saindang opisina an mga calificadong nang votante sa masunod na eleksyon.

Kan nakaaging national asin local election an registradong votantes kan ciudad nag-aabot sa 105,000 alagad sa barangay asin barangay elections kan nakaaging 2018 nagbaba ini sa 96,430.

Nagbaba an rehistradong votantes kasunod kan saindang mga ginibong pagserni kan listahan kabali na si mga yaon na sa sementeryo, nagtatrabajo sa abroad asin si duwang veces nang nagpalyar magboto.

An continuing registration ginibo liwat matapos pirmahan ni Presidente Rodrigo Duterte an Acta Republica 11462 kan Deciembre 3, 2019 na nag-uuktaba naman sa May 11, 2020 Barangay asin Sangguniang Kabataan elections sa Deciembre 5, 2022.

Sinabi pa kan Comelec na kaipuhan ipadagos an pagpalista kan mga votantes bilang pagsunod sa pigmamando kan Acta Republica 8189 na mas midbid sa Voter’s Registration Act of 1996.

An filling of registration kan mga aplicante nagpupuon alas 8:00 nin aga hasta alas 5:00 nin hapon puon Lunes sagcod Sabado kabali na an mga piyesta opisyal, alagad dai kaayon an Abril 9 asin Abril 10, 2020 mantang ini an aldaw kan Jueves asin Viernes Santo; Deciembre 25, April 1, 2, 2021. (dpa)