Marampahog na tulay rinibayan Bailey Bridge

BAILEY BRIDGE, pighidaling pigkabit kan DPWH sa magagaba nang Sinibaan Bridge nganing buksan na sa pagagi nin mga light vehicle haling Manila asin Bicol. (Ernie Marfil)

Cabusao, Camarines Sur. Nahali na si kahaditan kan lokal na gobierno sa banwaan na ini sa pamamayo ni Alcalde Weng Sabalbero sa namemeligrong magrampahog na Sinibaan Bridge matapos iinstelar na digdi kan DPWH Bicol an Bailey Bridge.

Dai ngani nagsarong semana pataposon kasuodma an pagkabit kan Bailey Bridge nganing agihan kan magigian na vehiculos na may rutang Manila asin Bicol envez na mag-agi sa Andaya Highway nganing dai magkaigwa nin pagkagurobot kan trafico mantang nagpapadagos an reblocking project sa Barangay Beguito Viejo, Libmanan, Camarines Sur asin mga purotol-putol na reblocking project puon sa Sipocot sundo sa Lupi, CamSur.

An Bailey Bridge pigbugtak sana sa ibabaw kan marampahog nang tulay alagad sinabi kan DPWH Bicol dai man ining peligro mantang aagihan sana kan mga light vehicles.

Sinabi ni Engr. Ehla Arejola, jefe kan Construction Division kan DPWH Bicol an reblocking project sa Beguito Viejo matatapos sa Marso 2020 alagad mayong pigtalaan kun nuarin matatapos sa Andaya Highway.

Si Director Virgilio Eduarte kan DPWH Bicol iyo an nagpangako kan Bailey Bridge ki Usec Marvel Clavecilla sa ginibong emergency meeting kan Traffic Management Task Force sa paghanap nin solusyon sa problema sa bulos kan trafico sa Andaya Highway.

An Sinibaan Bridge naggagatak na an abaga kaini kan agihan nin heavy vehicles haling Manila asin Bicol kan magkaigwa nin problema sa trafico sa Andaya Highway.

Ibinawal kan LGU an pagagi kan mga truck asin bus sa Cabusao nin huli ta naggagatak na an abaga kan tulay alagad sa ngonian binugtakan na nin Bailey Bridge kan DPWH Bicol.

Sa ngonian nagdesisyon an task force na an viajeng pasiring sa Manila maagi sa Libmanan-Sipocot-Daet-Sta. Elena mientras na si south bound cars maaging Andaya Highway alagad dapat magliko pawala pagagi sa highway sa Sipocot asin maagi sa Cabusao-Libmanan pasiring sa Ciudad nin Naga. (dpa)