TOWING COMPANY: Dai na naghahatak vehiculo
Dai man iginilid kan City Hall an implementasyon kan towing ordinance dawa mayo nang hinahatak na vehiculo nganing darahon sa impounding area kan Maxicam Towing Company alagad pig-iisyuhan nalang nin tiket sa pagbalga kan ordinansa mantang an iba pag wheel clamp an ginigibo kan Public Safety Office (PSO).
Puon na iimplementar an expanded wheel clamp asin towing ordinance kan Enero 6, tolo sanang vehiculo an hinatak kan towing company alagad piglinaw kan PSO na mayong ceasefire sa implementasyon kan ordinansa.
Ini an mga pahayag sa Bicol Mail ni Renne Gumba, jefe kan PSO kan City Hall mantang inaabot nin veinteng vehiculo an tinatamaan aroaldaw kan wheel clamp asin sa tow away zone pig-iisyuhan na sana nin tiket na parejong P1,000 an penalidad. Sa sumadang ini nagtototal nin P30,000 an nacocolectang ingreso kan City Hall aroaldaw.
Nababa sana an numero kan saindang nadadakop kun aldaw nin mga Sabado asin Domingo.
Kun rereparohon sa tow away zone kulang na nagpapasaway na tsuper alagad igwa man giraray nadadakop huli sa estrictong pag-implementar kan ordinansa kan ciudad, sabi pa ni Gumba.
Sinabi ni General Manager Maximo Camacho kan Towing Company na naghahalat sana sinda nin apod sa PSO kun igwang hahatakon na vehiculo alagad kun mayo sindang magiginibo envez an saiyang prioridad iyo an negosyo sa auto shop.
Segun ki Camacho na igwang mga namamanuan an nag-oosip sa saiya nganing hatakon an vehiculo na yaon sa laog kan tow away zone alagad dai niya ini magigibo sagcod na dai nag-aapod sa an PSO.
Igwang siyang tres mil metros cuadong lote sa atubangan kan south bound terminal sa Barangay Bagumbayan Sur para sa mga mahahatak na vehiculo.
Sa Metro Naga Chamber of Commerce and Industry (MNCCI), Inc. sinabi ni Ferdinad Sia an presidente kan organisasyon nagsabi sa BM na pabor sinda sa ginigibo kan PSO na envez na paghatak kan towing operator sa mga vehiculo tiketan na sana kan law enforcer.
Mayo pang mangyayaring daños sa vehiculo, sabi pa.
An City Hall asin MNCCI nagtalaan nin urulay ngonian na Juevez, Enero 23 nganing magcrear nin technical working committee sa pag-adal kan saindang mga recomendasyon sa implementasyon kan expanded wheel clamp asin towing ordinance.
An TWC maghahali sa sektor nin negosyante, sektor nin transporte, PSO asin representante hali sa City Hall.
Ini si resulta sa ginibong dialogue ninda kan nakaaging semana sa opisyales kan City Hall sa pamamayo ni Alcalde Nelson Legacion alagad mayo nang nagtulod na suspendiron an ordinansa. (dpa)