Mt. Isarog buhay na bulkan


Si Dr. Paul Karson Alanis (nasa walang parte) asin si City Councilor Lito Del Rosario.


Dawa ngani likay na makatao nin kahandalan, pigprangka man giraray ni Dr. Paul Karson Alanis an Sangguniang Panlungsod kasoodma sa regular session na an Mt. Isarog, sarong bulkan na aktibo.

Sinabi ni Alanis, senior science research specialist kan Philippine Institute of Volcanology and Seismology asin OIC kan Mt. Mayon Observatory sa Tabaco, Albay, an Isarog Volcano saro sa 24 na bulkan na pigkokonsiderar kan Phivolcs bilang active volcanoes. An Pilipinas igwa nin 300 na bulkan asin 24 an aktibo.

Sa 24ng bulkan, apat an yaon sa Rehiyon Bikol: Mt. Isarog na yaon sa Camarines Sur; Mt. Mayon na yaon sa Albay; Mt. Bulusan sa Sorsogon, asin Mt. Iriga sa Camarines Sur.

Segun pa ki Alanis, aktibo an sarong bulkan kun ini nagtuga na sa laog kan recent geological period o sa laog nin 10,000 years. Basado sa radiometric dating, an Bulkan Isarog nagsabog 900 years na an nakalihis, pruweba kaini an mga darakulang gapo na nakawarak sa mga banwaan na nakapalibot sa bulkan na iyo an isinairarom sa radiometric dating.

Ginibo ni Alanis an pagbuyagyag kan comprehensive historical data kan Bulkan Isarog sa Sanggunian pagkatapos na hagadon ni Konsehal Del Rosario an presencia kan Phivolcs sa sesyon regular kasoodma bilang parte kan paghaman nin mga lakdang dapit sa disaster mitigation and management.

Sinabi ni Del Rosario, chairman kan Committee on Public Safety and Disaster Management sa Sangguniang Panlungsod na popoonan tolos kan saiyang oficina an paghaman nin ordinanza na matao nin giya sa publiko tanganing mailikay sinda sa maraot na rimalaso na pwedeng darahon kan Bulkan Isarog.

Sinabi ni Alanis na an Bulkan Isarog na igwa nin 1,966 kilometer na elevation o height asin sarong active stratovolcano na yaon sa Northwest-Southeast Bicol volcanic area. (Jason Neola)