SA CIUDAD NIN NAGA: Casong HIV naglangkaw 100%

Naalarma na an City Hall sa padagos na paglangkaw kan casong Human Immunodeficiency Virus (HIV) sa Ciudad nin Naga matapos maglangkaw nin 100 por ciento base sa listahan kan Naga City Social Hygiene Clinic puon kan Enero 1 hasta Deciembre 31, 2019.


Si Consejal Sonny Rañola, pamayo kan Committee on Health sa Sangguniang Panlungsod sa saiyang privilege speech sa sesyon sa consejo kan Martes, Enero 21 pigbuyagyag kaini sa listahan hali sa opisina ni City Health Officer Dr. Vito ‘Butch’ Borja nagsakat na sa 42 casong HIV na anas kalalakihan mala ngani igwa nang 18 años sagcod sa nag-eedad nang 41.

Sa listahan na ini nagluluwas an Ciudad nin Naga iyo na an numero uno sa Bicol na may halangkaw na caso sa rehiyon cinco, sabi pa kan consejal.

Sa record kan Social Hygiene Clinic kan CHO, sinabi pa ni Rañola naglangkaw nin 100 por ciento an caso nin huli ta kan taon 2018 igwa sanang 21 caso alagad kan nagtalikod na taon 2019 nagsakat sa 42 na caso. An virus na puedeng maging causa nin AIDS iyo na an pinaka-advanced stage kan HIV infection.

Saiyang sinabi na kun anas kalalakihan an apektado kan helang huli kan lalaki sa lalaki an nagdudurogan. Sa entrevista man kan Bicol Mail ki City Health Officer Borja, sinabi kaini an saindang listahan nagluluwas sa itinaong address kan nagpa-examin asin nagpositivo sa HIV test anas mga residente kan ciudad.

Nangapudan man an chairman kan Committee on Health kan SP sa mga nagkakawat na lalaki sa lalaki an leksyon digdi maglikay o prevention nganing dai sinda kapotan kan delicadong helang.

Sa iba pang Sexually Transmitted Infections (STIs) nagaabot na sa 93 an caso sa gonorrhea; 72 sa sainda mga lalaki asin 21 mga babae; Hepatitis igwang pitong caso, saro an lalaki asin anom na babae; Syphilis – 44 caso an 30 digdi mga lalaki asin 14 an mga babae; sa Genital warts – 2 caso asin an tinamaan anas lalaki asin sa Trichononiasis duwang caso an tinamaan duwang babae na nag-eedad nin 16 años hasta 24 años. (dpa)