PAGMAHAL SA PRESYO KAN FACE MASK Opurtonistang negosyante pinatanidan kan DTI Bicol

Nagpatanid na an Department of Trade and Industry (DTI) sa Bicol na andam sangatan nin caso kan ahencia an mga opurtonistang negosyante na paliog na an presyo sa pagpabakal kan face mask.

Nganing maka-aksyon tolos an DTI Bicol dapat maging vigilante na an consumedores sa paagi nin paghagad nin opisyal na recibo asin kun ‘overprice’ itao sa arin man na opisina provincial kan ahencia nganing casohan sagcod na pamultahan an negosyante.

Pagsinutil sa Consumer Act o Acta Republika 7394 an aatubangon na caso kan arin man na pasaway na negosyante.

Ini an mga pahayag ni DTI Regional Director Jocelyn Blanco kan mag-atubang sa miembros kan media sa Ciudad nin Naga kan Martes, Febrero 4 na ginibo sa Avenue Plaza.

Siisay man makakua kan OR na overprice an face mask isumiter sa opisina kan DTI nganing aksyonan ko bako lang ining lokal na problema envez international emergency, sabi pa ni Blanco.

Pig-ispon kan direktor na igwang nagbakal nin dakul na mga face mask sa Ciudad nin Naga sa cantidad na P5 an presyo cada pidaso alagad pagluwas sa establisimiento, ipinapabakal na sa cantidad nin P25.00.

An isyung ini pigpaabot na ni Blanco ki Alcalde Nelson Legacion mientras na sinda igwa nin police power. Pagbalga sa price act kan medicine supply huli ta kabali digdi an medicina, medical supply asin medicine devices.

Sinabi pa na nag-aksyon na an DTI Bicol mantang an problema sa pagwarawara kan face mask bako lang kan Department of Health asin an ginibo kan ahencia naggibo nin iniciativo sa paagi kan pag-monitor kan suplay sa Bicol.

Alagad sa saindang findings kulang talaga an suplay, sabi pa.

Nangyari ini huli ta kan magtuga an Volcan Taal piglimitaran an suplay sa Bicol envez pigdadara sa apektadong residentes sa Batangas.

Sa saindang paglibot sa anom na provincia kan rehiyon solamente an Catanduanes an igwa nin suplay kan M-95 alagad kulang man an mga parabakal.

Kabali sa saindang pig-monitor an suplay nin alcohol sa mga botica asin malls alagad dai man nin problema. Saiya man inomaw an Angena Trading sa Ciudad nin Naga na nakatalaan na magdistribuer nin libreng maabot sa treinta mil (30,000) na tig-duruwang face mask. (DPAureus)