Piling national road sa Naga bawal sa tricycle

An lokal na gobierno kan Ciudad nin Naga haloy nang nag-iimplementar kan pagbawal sa mga tricycle na magkayod sa national road dawa dai pa nagpapaluwas nin direktiva an Department of Interior and Local Government (DILG).

Alagad igwang mga national road dai maiibitaran na agihan kan mga nagkakayod na tricycle siring kan Bagumbayan Sur asin Norte, M.T. Villanueva Avenue sagcod sa centro de negosyo asin an isyung ini yaon na sa diskreasyon kan Sangguniang Panlungsod asin jefe ejecutivo.

Ini an mga pahayag ni Renne Gumba, jefe kan Public Safety Office kan City Hall kasunod kan direktiva kan DILG na pigsusugo an mga LGU na ipagbawal na sa mga tricycle an pagviaje sa national road.

An mga lugar na dai tinutugotan iyo an Magsaysay Avenue, Concepcion Grande sundo sa Del Rosario asin Diversion road.

Alagad igwang porsyon pasiring sa Puregold area hali sa terminal sagcod sa Robinson area an puedeng agihan na luwas sa Diversion road, sabi pa kan PSO.

Sa ngonian dai pa sinda nakakarecibe nin bagong direktiva hali sa City Hall na ipagbawal sa gabos na lugar kan national road asin status muna an saindang pig-iimplementar.

An Naga City Police Office nakarecibe nin direktiva hali sa Camp Semion Ola sa Ciudad nin Legazpi na nag-oorden na makipag-coordinar sa City Hall nganing iimplementar an memorandum circular kan DILG.

Alagad an NCPO sa pamamayo ni City Director Col. Felix Servita Jr. dai pa nakakarecibe nin orden sa City Hall kun nuarin iimplementar an kasugoan kan opisina central kan DILG.

Sa Land Transportation Office (LTO), sinabi ni regional director Noreen Lutey na igwang mga ordinansa na tinutogotan kan LGUs base sa pig-isyung franquicia na puedeng magkayod dawa yaon sa sakop kan national road.

Sinabi ni Lutey hagad ninda sa ibang mga LGU na enmiendahan an saindang ordinansa nganing mayong problema. (dpa)