SA NOVEL CORONAVIRUS: Quarantine bldg. sa BMC preparado na
QUARANTINE BLDG. Sa taas binubukasan ni DOH Regional Director Ernie Vera an emergency room kan posibleng pasyente na dinapuan nin nCov mantang sa baba dating staff house kan BMC alagad ginigibo nang temporaryong papaestaran sa laog nin 14 diyas kan pasyente. (DPA)
Preparado na an Bicol Medical Center (BMC) kan saindang facilidades sa quarantine bldg. asin emergency isolation tents oras na magbungkaras an novel Coronavirus (2019-nCov) sa Camarines Sur.
Ini kasunod kan kumfirmasyon kan Department of Health na igwa nang sarong binawian nin buhay na Chinese national sa Manila na haling Ciudad nin Wuhan, China.
Pinangenotan ninda Department of Health (DOH) regional director Ernie Vera asin BMC OIC Medical Director Dr. Franciso Sales III asin Dr. Maryjane Uy an pagpaheling sa miembros kan media kan isolation tents asin quarantine rooms na dating staff house kan BMC.
Oras na magkaigwa nin pasyente an personajes kan hospital seseguradohon na kumpleto nin personal protected equipment, alagad prohibido na magsunko sa quarantine room an mga mahal sa buhay kan posibleng pasyente.
Sa press conference, sinabi ninda Dr. Manuel Jose Rañola an jefe kan Infectious Disease kan BMC asin Director Vera na mayo pang casong nahawaan kan nCov an pig-confined sa hospital asin kun igwa man iyan fake news.
Igwa nang nagluwas sa social media na may casong nCov sa Ciudad nin Iriga asin Legazpi alagad an bagay na ini pinahimotikan ni Director Vera.
Saiyang piglinaw na uniko an saiyang opisina rehiyonal iyo an puedeng magpaluwas nin informasyon asin mag-atubang sa media kun igwa nang kumfirmadong casong coronavirus sa Bicol.
Si Dr. Rañola iyo an nagpaliwanag sa press conference kan mga prevention asin kun panong makakalikay an publiko sa delicadong helang.
Alagad saiya pang sinabi na bako pang malala an caso kan nCov sa Pilipinas kumpara sa mga naenot na casong Middle East Respiratory Syndrome na nagsakat sa 35 por ciento, Sever Acute Respiratory Syndrome (SARS) kan 2002 na nag-abot sa 10 por ciento alagad sa ngonian base sa mga datus kan DOH an nCov na apektado na an Filipinas igwa sanang 2 por ciento.
An BMC magpapadagos kan saindang advocacia sa publiko kun panong makakaibitar sa nCov, sabi pa ni Rañola.
Sa Ciudad nin Naga, si Alcalde Nelson Legacion nagbilog na nin Infectious Prevention Task Force na siya an chairman bilang pag-andam laban sa delicadong helang.
Magkakaigwa an ciudad nin mahiwas na impormasyon asin preventive measures nganing pagtarabangan kan iba pang ahencia asin katuwang niya sa task force sinda City Health Office Dr. Vito Borja, Consejal Sonny Ranola bilang Chairman kan Committee on Health sa Sangguniang Panlungsod, Dr. Manuel Jose Rañola kan BMC, Dr. Sanchez, Dr. Manny de Guzman kan Department of Education sa Ciudad nin Naga, Bicol Central Station Manager Nonoy Reforsado, Acting City Engr. Alexander Caning bilang jefe kan ENRO Office asin Public Safety Office. (dpa)