Grupo nin paraoma nagtitipon 1-M na pirma vs rice tariffication law

Padagos na nagtitipon nin on milyon na pirma an sektor nin paraoma asin progresibong grupo nganing ipadara ninda an petisyon ki Presidente Rodrigo Duterte asin sa congreso para hagadon na dapat ibasura na an Republic Act 11203 na mas midbid sa Rice Liberalization Law.

An signature campaign ribo-ribo na an nagpahayag nin suporta asin nagpipirma mantang padagos naglilibot an petisyon bako lang digdi sa rehiyon cinco envez sa gabos na lugar sa Luzon, Visayas asin Mindanao.

Nangengenotan sa petisyon iyo an Bantay Bigas, Amihan National Federation of Peasant Women, Anakpawis Partylist, asin Gabriela Women’s Party.

Si Nelsy Rodriguez, lider kan BAYAN Camarines Sur nagsabi na sarong taon na kan Febrero 14, 2020 an Rice Tariffication Law maabot na sa cinco mil an nakapirma bako lang hali sa sektor nin paraoma maging grupo nin trabajadores, sektor nin transporte, estudiantes, ordinaryong namamanuan maging empleado sa pribado sektor asin sa gobierno.

Luway-luway nang ginagadan an pagbuhay kan mga paraoma nin huli ta puon na mag-epekto an rice tariffication law nagparabarato an presyo kan paroy alagad an bagas halangkaw man giraray an presyo sa mga mercado.

Saro sa probisyon kan ley iyo an paghale sa limitasyon o restriksyon sa bolyum kan imported rice, na naging causa kan pagbagsak kan presyo nin paroy asin paghale sa punksyon o operasyon kan National Food Authority na magpabakal kan mas baratong bagas sa mercado.

Pigsasabi kan gobierno, solusyon an RA 11203 sa padagos na paglangkaw kan presyo kan commercial rice arog kan nangyari kan taon 2018, na naglabi sa P50 cada kilo kan bagas, dai man narealisar an patubog na mabababa an presyo kan bagas alagad an apekto iyo an pagbagsak sa presyo kan paroy mantang nagbaha na an imported rice sa mga lokal na mercado.

Dakul pang probisyon kan RA 11203 an dai man nakatabang sa mga paraoma envez an pinaboran si dati nang milyonaryong rice traders sa nasyon. (dpa)