Magsaysay Avenue, tulay papalakbangon

Dai maiibitaran na magkagurubot an bulos kan trafico sa Magsaysay Avenue, Ciudad nin Naga oras na masikad na an Camarines Sur 3rd Engineering District kan Department of Public Works and Highways (DPWH) sa road widening project asin pagpahiwas kan Magsaysay Bridge na piglalaoman puponan sa ika-duwang cuarto ngonian na taon.

Igwa nang coordinasyon si District Engr. Rebecca Roces sa City Hall sa nakatalaan iimplementar na road widening project sa Magsaysay Avenue na maantos sa Rotonda kan Barangay Concepcion Grande.

Si Engr. Alexander Caning, Acting City Engineer kan Ciudad nin Naga nagpahayag sa Bicol Mail na igwa nang coordinasyon sa saiyang oficina an Camarines Sur 3rd Engineering District alagad saindang hinahalat an exactong bulan nganing makaandam an City Hall sa ibubugtak na mga traffic signed nganing malikayan an magabat na bulos kan trafico.

Nakaabot na sa kaaraman ni Engr. Caning na igwa nang ginigibong mga pagsukol an DPWH kan pagpahiwas kan tinampo.

Gigibohon nang veinte metros an lakbang kan tinampo na sakop kan national road.

Afuera kan P20 milyon na road widening project na iimplementar kan district office, an DPWH regional office iyo man an ma-implementar sa pagpalakbang kan Magsaysay Bridge na nagcacantidad an proyecto nin P60 milyon.

An pig-iimplementar na road widening project kan M.T. Villanueva Avenue iyo man an masumpay sa pagpalakbang kan tulay asin Magsaysay Avenue.

An milyones pesos na proyecto sa infrastractura sa Ciudad nin Naga kabali sa P1 bilyon na budget sa 3rd Congressional District ni Congresista Gabby Bordado Jr. (dpa)

Natadang sarong puon nin kahoy sa zona dos kan Brgy. San Felipe, Ciudad nin Naga putol kan DPWH dawa igwang permit to cut kan DENR alagad nabagat kan temporary environmental protection order na pig-isyu kan corte kan Agosto 2017 asin sinakat an caso kan Solicitor General sa Corte de Apelasyon. (dpa)